Aqrar İnnovasiya Mərkəzinin təşkilatçılığı ilə İmişli rayonunda keçirilən Aqrar Biznes Festivalı çərçivəsində “Dövlətin maliyyə mexanizmləri” mövzusunda geniş tərkibdə panel müzakirə təşkil edilib.

Mərkəzdən Marja-ya verilən məlumata görə, müzakirənin əsas məqsədi fermer və sahibkarlara kənd təsərrüfatı sahəsində mövcud maliyyə mexanizmləri, güzəştli kredit imkanları və dövlət dəstəyi barədə məlumatlandırma və maliyyə resurslarına çıxış imkanlarını genişləndirmək olub.

Panel müzakirə çərçivəsində kənd təsərrüfatı sahəsinə dövlət dəstəyi, güzəştli kreditlər, aqrar sığorta imkanları və digər maliyyə alətləri barədə çıxışlar edilib.

Paneldə Aqrar Kredit və İnkişaf Agentliyi, Sahibkarlığın İnkişafı Fondu və Aqrar Sığorta Fondunun mütəxəssisləri tərəfindən fermerlərə təqdim olunan dəstək mexanizmləri barədə, o cümlədən onların müraciət prosedurları, kredit şərtləri və sığorta proqramları haqqında ətraflı məlumat verilib.Həmçinin panel çərçivəsində Rabitəbank, Unibank, Yelo Bank, FİNCA BOKT kimi aparıcı bank və maliyyə təşkilatlarının nümayəndələri spiker qismində çıxış edərək, fermerlər və sahibkarlar üçün mövcud kredit məhsulları və maliyyə xidmətləri barədə məlumatlar veriblər.

Müzakirə zamanı fermer və sahibkarlar öz suallarını ünvanlayıb, kənd təsərrüfatı sektorunda maliyyələşmə ilə bağlı aktual məsələlər ətrafında fikir mübadiləsi aparılıb. Bank və maliyyə qurumlarının nümayəndələri kredit müraciətləri, faiz dərəcələri və maliyyələşmə mexanizmləri barədə ətraflı məlumat verərək, sahibkarlara texniki dəstək göstəriblər.

İmişli rayonunda keçirilən panel müzakirə fermerlərin maliyyə resurslarına çıxış imkanlarının genişləndirilməsi istiqamətində atılan addımların effektivliyini artırmağa xidmət edib.

Qeyd edək ki, Aqrar Biznes Festivalı çərçivəsində keçirilən “Kredit yarmarkası”nda fermerlər və sahibkarlarla bank və kredit təşkilatlarının nümayəndələri arasında görüşlər keçirilib, tərəflər arasında potensial əməkdaşlıq imkanları müzakirə edilib.

Qeyd edək ki, Kənd Təsərrüfatı Nazirliyinin Aqrar İnnovasiya Mərkəzi tərəfindən  bölgələrdə keçirilən Aqrar Biznes Festivalları davam edəcək.