Azərbaycanda “İmprotex İndustries” zavodunun istehsal etdiyi “Revival” mexaniki minatəmizləyən texnikaları xaricdə artan maraqla qarşılanır. Bu istiqamətdə növbəti vacib addım Səudiyyə Ərəbistanı Krallığının Müdafiə Nazirliyi tərəfindən atılmışdır. 13-15 yanvar 2025-ci il tarixlərində Səudiyyə Ərəbistanının Müdafiə Nazirliyinin nümayəndə heyəti Azərbaycana işgüzar səfər gerçəkləşdirmişdir. Səfər Azərbaycan Respublikası Müdafiə Sənayesi Nazirliyinin dəstəyi ilə həyata keçirilmişdir.

Səfər çərçivəsində “İmprotex” Şirətlər qrupunun təmsilçiləri ilə görüşlər keçirilmişdir. Bu görüşlər zamanı Səudiyyə Ərəbistanına “Revival” markalı texnikaların ixracı potensialı və minatəmizləmə sahəsində mümkün əməkdaşlıq istiqamətləri ətraflı müzakirə olunmuşdur.

Nümayəndə heyəti həmçinin Azərbaycan Respublikasının Minatəmizləmə Agentliyinin rəsmiləri ilə görüş keçirmişdir. Bu görüş çərçivəsində nümayəndə heyəti Qarabağa səfər etmiş, orada “Revival” texnikalarının real əməliyyat şəraitində sınaqdan keçmə prosesini izləmişdir. Bu texnikaların effektivliyi qonaqlar tərəfindən yüksək qiymətləndirilmişdir.

Səfər çərçivəsində daha bir vacib görüş Azərbaycan Respublikası Müdafiə Nazirliyi ilə keçirilmişdir. Bu görüşdə hər iki ölkə arasında hərbi sferada, xüsusilə mühəndis-texniki sahədə əməkdaşlıq perspektivləri dərindən müzakirə olunmuşdur.

Nümayəndə heyəti səfər çərçivəsində Azərbaycan Respublikası İqtisadiyyat Nazirliyi yanında İqtisadi Zonaların İnkişafı Agentliyində də görüş keçirmişdir. Görüşdə iki ölkə arasında iqtisadi əlaqələrin gücləndirilməsi və Azərbaycanın müdafiə sənayesi məhsullarının Səudiyyə Ərəbistanı bazarına çıxarılması üzrə imkanların genişləndirilməsi müzakirə olunmuşdur.

Bundan əlavə nümayəndə heyəti “Improtex industries” zavodu tərəfindən ilkin prototipi hazırlanmış və gələcəkdə davamlı istehsalına başlanacaq tam yerli istehsal olan İTX 6L, İTX 15M və İTX 20H model zirehli hərbi avtomobillərlərinə baxış keçirmiş və onların perspektivi ilə tanış olmuşdurlar.

Görüş əsnasında “Improtex” şirkətlər qrupu ilə Səudiyyə Ərəbistan Krallığı arasında uzunmüddətli əlaqənin əsasları qoyulmuşdur. 

Bu səfər, Azərbaycan və Səudiyyə Ərəbistanı arasında dərinləşən müdafiə, iqtisadiyyat və texnoloji əməkdaşlığın növbəti nümunəsidir.