Niderlandın “ING Group” şirkəti 2025-ci il üçün Azərbaycanda iqtisadi artım üzrə proqnozunu 2,6 %, 2026-cı ildə 2,8 % səviyyəsində müəyyən edib.

Bu barədə şirkətin açıqladığı proqnozlara istinadən xəbər verilir. 

Bu göstəricilər “ING Group”un öncəki proqnozu ilə müqayisədə dəyişməyib.

Hesabata əsasən, 2025-ci ilin birinci rübündə iqtisadi artım proqnozu 2 %, ikinci rübdə 2,5 %, üçüncü və dördüncü rüblərdə isə 3 % səviyyəsində nəzərdə tutulub. 2026-cı ilin son rübündə isə iqtisadi artımın 2 % təşkil edəcəyi proqnozlaşdırılır.

Azərbaycan hökumətinin proqnozlarına görə, 2025-ci ildə ÜDM-in artımı 3,5 %, 2026-cı ildə 2,8 % səviyyəsində gözlənilir. Ötən il Azərbaycanda ÜDM 4 %-dən çox artıb.

Birləşmiş Millətlər Təşkilatının (BMT) proqnozlarına görə, bu il və 2026-cı ildə Azərbaycanda ÜDM-in artımı 3 % təşkil edəcək.

Dünya Bankının qiymətləndirmələrinə görə, Azərbaycanda ÜDM istehsalının 2025-ci ildə 2,7 %, 2026-cı ildə isə 2,4 % artacağı gözlənilir.

Beynəlxalq Valyuta Fondu (IMF) bu il Azərbaycanda ÜDM artımını 2,5 %, 2029-cu ildə isə 2,4 % səviyyəsində proqnozlaşdırır.

Avropa Yenidənqurma və İnkişaf Bankının (EBRD) proqnozuna görə, 2025-ci ildə Azərbaycanda ÜDM artımı 2,7 % olacaq.

Asiya İnkişaf Bankı (ADB) Azərbaycanda bu il iqtisadi artım proqnozunu 2,6 % səviyyəsində proqnozlaşdırır.

“S&P Global Ratings” beynəlxalq reytinq agentliyinin proqnozlarına görə, 2025-ci ildə Azərbaycanın ÜDM-i 2 %, 2026-cı ildə 1,5 %, 2027-ci ildə isə 1,5 % təşkil edəcək.

“Fitch Ratings” beynəlxalq reytinq agentliyi ölkə iqtisadiyyatının bu il 2,7 % artacağını, 2026-cı ildə isə 2,3 %-ə qədər yavaşlayacağını proqnozlaşdırır.

Azərbaycan üçün inflyasiya proqnozunu yeniləyib

Niderlandın “ING Group”u bu il üçün Azərbaycanda orta illik inflyasiyanın 4,4 %, 2026-cı ildə isə 4,5 % səviyyəsində olacağını proqnozlaşdırır.

Şirkətin bundan əvvəlki gözləntilərinə nisbətən bu il üçün açıqlanan yeni proqnoz 0,3 faiz bəndi artıb. 2026-cı il üçün inflyasiya proqnozu isə ötən ilin dekabrındakı gözləntilərlə eynidir.

Proqnoza əsasən, 2025-ci ilin birinci rübündə Azərbaycanda orta illik inflyasiya 5 %, ikinci rübdə 5,3 %, üçüncü rübdə 3,5 %, dördüncü rübdə isə 3,7 % nəzərdə tutulub.

“ING Group” Azərbaycanda 2026-cı ilin son rübündə orta illik inflyasiyanın 5,4 % olacağını proqnozlaşdırır.

İqtisadiyyat Nazirliyi 2025-ci ildə ölkədə illik inflyasiyanın 4,6 %, 2026-cı ildə isə 4 % olacağını gözləyir. Azərbaycan Mərkəzi Bankının son proqnozlarına (2024-cü ilin oktyabrında) görə, Azərbaycanda 2025-ci ildə illik inflyasiya 5,8 % olacaq.

Birləşmiş Millətlər Təşkilatının (BMT) proqnozlarına görə, Azərbaycanda bu il orta illik inflyasiya 3,6 %, 2026-cı ildə 3,1 % olacaq.

Qeyd edək ki, Azərbaycanda ötən ilin 11 ayında orta illik inflyasiya 2 % təşkil edib.

© "Report"