Qlobal investisiya bankı "Goldman Sachs", artıq 2025-ci ilin sonuna qədər bir unsiya qızılın qiymətinin 3 min dollara çatacağını gözləmədiyini açıqlayıb. Bank, ABŞ Mərkəzi Bankının (FED) daha az faiz endirimi edəcəyi gözləntiləri ilə bu proqnozunu 2026-cı ilin ortalarına təxirə salıb.

Marja.az xəbər verir ki, Bankın analitikləra bildiriblər ki, 2025-ci ildə daha yavaş monetar yumşalmanın (faizlərin yavaş-yavaş aşağı salınması) qızıl ilə dəstəklənən birja fondlarına (ETF) tələbi azaldacağı gözlənilir. Bu səbəbdən də 2025-ci ilin sonuna kimi qızılın qiymətinin bir unsiya üçün 2910 dollara çatacağını proqnozlaşdırırlar.

Dekabr ayında ABŞ seçkilərindən sonra azalan qeyri-müəyyənlik səbəbindən qiymətlər sabitləşib. Aşağı spekulyativ tələbi daha yüksək mərkəzi bank alışları kompensasiya edib və bu, son bir neçə ayda qızıl qiymətlərini sabit saxlayıb. Analitiklər qeyd ediblər ki, mərkəzi bankların "iştahı" qızıl qiymətləri üçün əsas amil olmağa davam edəcək. 2026-cı ilin ortalarına qədər mərkəzi bankların aylıq qızıl alışlarının orta hesabla 38 ton olacağını təxmin edilir.

Qızıl keçən il 27 faiz bahalaşaraq ABŞ-da monetar yumşalma (faizlərin aşağı salınması), "təhlükəsiz sığınacaq" tələbi və dünya mərkəzi banklarının davamlı alışları səbəbindən rekord qırıb. Lakin noyabrın əvvəlində Donald Trampın ABŞ seçkilərində qələbəsi dolları bahalaşdırdığı üçün bu prosesi dayanıb. FED rəsmiləri inflyasiya ilə bağlı yeni narahatlıqlar fonunda bu il borclanma xərclərini azaltmaq üçün daha ehtiyatlı yanaşmanın zəruriliyini vurğuladıqları üçün son zamanlarda qızıl təzyiq altında qalıb.

Goldman-ın iqtisadçıları, bu il FED-dən əvvəlki 1 bəndlik proqnoza qarşı bu il 0,75 faiz bəndi faiz endirimi gözləyirlər.Həmçinin iqtisadçılar Donald Trampın ikinci administrasiyası zamanı mümkün siyasət dəyişikliklərinin faiz dərəcələrinin yüksəlməsinə səbəb olacağına şübhə ilə yanaşırlar.

FED rəsmilərinin açıqlamalarından sonra qızılın ucuzlaşması davam edir

Qızıl, FED rəsmilərinin həftə sonu şərhlərində; ABŞ Federal Ehtiyat Sisteminin (mərkəzi bank, FED) bu il faiz dərəcələrinin aşağı salınmasına daha ehtiyatlı yanaşacağını bildirdikləri üçün ucuzlaşır.

FED-in San-Fransisko şöbəsinin rəhbəri Meri Deyli və FED-in İdarə Heyətinin üzvü Adriana Kuqler yüksək inflyasiyaya son qoyulmasının və 2 faizlik hədəfə çatmağın vacibliyini vurğuladıqdan sonra külçə qızılın unsiyası 2633 dollara düşüb (Bakı vaxtı ilə saat 09:30-a olan məlumat). Qızıl faiz ödəmir, amma aşağı dərəcələr ümumiyyətlə qızılın xeyrinədir. 

Ötən ay FED 2025-ci ildə edəcəyini gözlədiyi faiz endirimlərinin sayını azaldıb. FED sədri Jerome Powell bildirib ki, borclanma xərclərini azaltmaq üçün daha diqqətli olmalıdırlar. Bu, ABŞ-da monetar ekspansiya nəticəsində keçən il rekord qıran və 27 faiz bahalaşan qiymətli metal üçün maneə ola bilər.