"Günlük 900-1100 cüt ayaqqabı istehsal edirik"

"Günlük 900-1100 cüt ayaqqabı istehsal edirik"

"Günlük 900-1100 cüt ayaqqabı istehsal edirik"

Ağdam Sənaye Parkında yerləşən “BAFCO İnvest” MMC-nin ayaqqabı istehsalı fabrikində 2024-cü il aprelin 1-dən müxtəlif təyinatlı ayaqqabıların və poliuretan çəkmələrin istehsalına başlanılıb. Hazırda fabrikdə günlük 900-1100 cüt məhsul istehsal olunur.

Bunu müsahibəsində “BAFCO İnvest” MMC-nin direktoru Elnur Allahverdiyev deyib.

Elnur Allahverdiyev bildirib ki, fabrikə ümumi 12 milyon manat sərmayə qoyulub. Bütün avadanlıqlar Almaniyanın “Desma” markasına məxsusdur. Fabrikin istehsal gücü xüsusi təyinatlı ayaqqabılar üzrə ildə 360 min cüt, poliuretan çəkmələr üzrə isə ildə 150 min cütdür.

Fabrikdə hazırda 70 nəfər işçi çalışır ki, onlardan 50 nəfəri Ağdam və ətraf rayonlardandır. Bu yaxınlarda ikinövbəli iş rejiminə keçilib. 2025-ci ilin ortalarına işçi sayının 100 nəfərə çatdırılmasını planlaşdırılır.

MMC-nin direktoru qeyd edib ki, müəssisə 2024-cü ilin noyabr ayında EN İSO uyğunluq sertifikatına layiq görülüb. Bu sertifikat fabrikin məhsullarının Avropa və dünyanın digər bazarlarına ixracına imkan yaradır: “2024-cü ildə yalnız Azərbaycan bazarı üçün məhsullar istehsal edib satmışıq. Sertifikat əldə olunduğuna görə biz artıq MDB ölkələrinə və Avropa bazarına da çıxacağıq. MDB ölkələrindən məhsullarımıza böyük maraq var. Avropa ölkələrindən isə İspaniya, İtaliya, Çexiya və Almaniya ilə danışıqlar aparılır, artıq onlara nümunələr göndərilib”.

Qeyd edək ki, “BAFCO İnvest” MMC 2023-cü ilin mart ayında Ağdam Sənaye Parkının rezidenti kimi qeydiyyata alınıb. Prezident İlham Əliyev 2024-cü il sentyabrın 19-da fabrikin açılışında iştirak edib.