Donald Trampın ABŞ-ın 47-ci prezidenti seçilməsindən sonra əmtəə bazarında kəskin dalğalanmalar davam edir. Bu kəskin dalğalanmalar daha çox kənd təsərrüfatı əmtəələrinin qiymətlərində müşahidə olunur. Həmçinin iqlim və hava şəraiti əmtəə bazarında kənd təsərrüfatı qrupunda ticarət edilən məhsulların qiymətlərində kəskin dəyişikliklərə səbəb olur.

Marja xəbər verir ki, ABŞ-da fəaliyyət göstərən Qitələrarası Birjada (Intercontinental Exchange) 1 yon kakaonun qiyməti 12 min 931 dollara çataraq tarixi ən yüksək səviyyəsinə çatıb. İlin əvvəlindən kakaonun qiyməti 200 faizdən çox artıb.

Kakao qiymətləri tədarük narahatlığına görə rekord qırır.

Əlverişsiz hava şəraitinin Qərbi Afrikadakı məhsullar üçün təhlükə yaratması və qlobal ehtiyatların azalması səbəbindən kakao qiymətlərində artım davam edir.

Analitiklərin fikrincə, qlobal kakao ehtiyatları kəsirə düşə bilər.

Fil Dişi Sahili və Qanadakı zəif istehsal səbəbiylə il boyu tədarüklə bağlı narahatlıqlar kakao qiymətlərinin rekordlar qırmasında mühüm rol oynayıb. Analitiklər qlobal kakao ehtiyatlarının 2024/25 mövsümündə defisit olacağını proqnozlaşdırırlar.

Fil Dişi Sahilindəki ixracatçıların keyfiyyətsizliyə görə kakao paxlasını rədd etdiyi bildirilir, bu vəziyyətin qlobal kakao tədarükünə mənfi təsir göstərə biləcəyi təxmin edilir.

Ölkədə kakao məhsulunun azalması da qiymətlərin artmasına səbəb olur.

Kakao tədarükündəki problemlərin əsas səbəbi uzunmüddətli quraqlıq və güclü yağış kimi pis hava şəraiti olsa da, bitki xəstəlikləri də məhsula mənfi təsir edib. Xüsusilə, kakao ağaclarının ölümünə səbəb olan CSSVD virusu istehsala mənfi təsir göstərən amillər arasında olub.

Qərbi Afrikada başlayan Harmattan küləklərindən sonra Fil Dişi Sahilində kakao tədarükünün azalması, kakao yığımı üçün təhlükə yaratması və az miqdarda məhsulun çatdırılma üçün limanlara gəlməsi bu məhsulun qiymətlərinin artmasına qapı açıb.

Qiymət artımına səbəb olan digər faktor isə Qananın məhsulun pis olması səbəbindən 350 min tona qədər kakao paxlasının tədarükünü növbəti mövsümə təxirə salmağı planlaşdırdığı xəbəri olub.

Qlobal iqlim dəyişikliyinin yaratdığı əlverişsiz hava şəraiti, bitki xəstəlikləri və kakao təsərrüfatlarını əvəz edən qeyri-qanuni qızıl hasilatı səbəbindən ölkədə kakao istehsalı azalır.

Qanalı fermerlərin qaçaqmalçılıq yolu ilə qonşu ölkələrə kakao paxlasını apararaq orada daha yüksək gəlir əldə etmək üçün satması ilə bağlı iddialar da qiymətlərin kəskin artmasına dəstək verir.