Bu həftə bazarların diqqət mərkəzində ABŞ-dan gələn sıx məlumat təqvimi və FED sədri Jerome Pavelin çıxışı olacaq. Cümə günü açıqlanacaq əmək bazarı, xüsusilə də, NFP göstəriciləri ABŞ iqtisadiyyatının məşğulluq görünüşü və maaş artımları ilə bağlı əhəmiyyətli ipuçları verəcək. Bundan əlavə, bugün dərc olunacaq ISM xidmət sektorunda PMI məlumatları ABŞ-ın iqtisadi fəaliyyəti haqqında əhəmiyyətli siqnallar verəcəkdir.

FED-in dekabrda 25 bəndlik faiz endirimi etmə ehtimalı hazırda 66% səviyyəsində qiymətləndirilir. Ancaq, bu gözlənti həftə ərzində gələn məlumatlarla dəyişə bilər. Pavelin bugünə nəzərdə tutulmuş çıxışı da bazarlarda aktivliyi artıra bilər.

ABŞ və BRİCS arasındakı gərginliklə yanaşı, İsrailin Hizbullaha və İranın dəstəklədiyi qruplara qarşı hücumları və Suriyada baş verən hadisələr də qlobal bazarlara təsir göstərə bilər. Yaxın Şərqdə artan gərginlik fonunda investorların təhlükəsiz sığınacaq axtarışları yenidən arta bilər. Bununla belə, mövcud perspektivdə həftənin məlumat trafikini nəzərə alsaq, bu təsirin hələ bazarlarda tam olaraq qiymətləndirildiyini söyləmək olmaz. Bu, bazarların Pavelin çıxışına və ABŞ-dan gələcək iqtisadi məlumatlara fokuslandığını göstərir.

Nəticədə, dolların həftəyə Trampın açıqlamaları və güclü məlumat gözləntiləri ilə müsbət başladığını görürük. Bu həftə açıqlanacaq məlumatların Trampın açıqlamalarına və FED-in proqnozlarına təsir etmə ehtimalı olduğundan, bazarlardakı volatilliyin yüksək qala biləcəyini görə bilərik. Digər tərəfdən, dolların 6 əsas valyuta qarşısında möhkəmlənməsi inkişaf etməkdə olan bazarlarda təzyiqə səbəb olacaq.

Bugün Avrozonada, Almaniyada, İngiltərədə və Amerikada Xidmət Sektorunda Biznes Aktivliyi İndeksi göstəriciləri dərc olunacaq. Günün ən önəmli xəbərləri isə, AMB sədri Kristin Laqardın Bakı vaxtı ilə saat 19:30-da, FED sədri Cerom Pavelin saat 22:45-də baş tutacaq çıxışlarıdır.

Məlumat İnvest-AZ İnvestisiya Şirkətinin analitikləri tərəfindən hazırlanıb.