“Microsoft” şirkətinin rəhbəri və baş hüquq işçisi Bred Smit (Brad Smith) ABŞ hökumətini Rusiya, Çin və İran kimi ölkələrdən dövlət tərəfindən dəstəklənən kiberhücumlara qarşı daha sərt mövqe tutmağa çağırıb.

Marja.az xəbər verir ki, Financial Times-a danışan Smit, kibertəhlükəsizliyin beynəlxalq münasibətlərdə daha prioritet məsələyə çevrilməli olduğunu bildirib. 

“Kiberhücumlara dözmək olmaz”

Smith, Donald Tramp administrasiyasının bu hücumlara qarşı daha sərt tədbirlər görməsi lazım olduğunu qeyd edərək, "Bu gün qarşılaşdığımız hücum səviyyəsinə əsla dözməməliyik" deyib. ABŞ şirkətlərinə qarşı "ransomware" hücumlarının əhəmiyyətli dərəcədə artdığını ifadə edən Smith, bu hücumların bəzi hallarda Rusiya hökuməti tərəfindən dəstəkləndiyini vurğulayıb.

Ötən həftə ABŞ təhlükəsizlik agentlikləri Çini Amerika telekommunikasiya şəbəkələrini hədəf alan genişmiqyaslı kibercasusluq kampaniyası aparmaqda ittiham edib.

Bayden rəhbərliyinin kibertəhlükəsizlik sahəsində ciddi irəliləyiş əldə etdiyini, lakin daha çox iş görülməsi lazım olduğunu qeyd edən Smith, "Bu hücumların qarşısını almaq və digər ölkələri bu cür hərəkətlərdən çəkindirmək üçün daha çox addımlar atılmalıdır" deyib.

Bred Smitin açıqlamaları Microsoft-un öz təhlükəsizlik standartlarının müzakirə mövzusu olduğu dövrə təsadüf edib. Mart ayında açıqlanan ABŞ Kibertəhlükəsizliyi Nəzarət Şurasının hesabatında Microsoft-un təhlükəsizlik tədbirləri qeyri-adekvat olaraq təsvir edilmiş və çinli hakerlərə Microsoft-un bulud sistemlərində yerləşdirilən ABŞ-ın yüksək vəzifəli məmurlarına məxsus yüzlərlə e-poçt hesablarına daxil olmaq imkanı verən səhvlər müəyyən edilmişdir.

Tənqiddən sonra Microsoft-un baş direktoru Satya Nadella şirkətin təhlükəsizliyi “hər şeydən üstün tutacağını” və işçilərin maaşlarını təhlükəsizlik performanslarına bağlayacağını açıqlamışdı.

Microsoft həmçinin keçən iyul ayında təhlükəsizlik yeniləməsi zamanı baş verən qlobal İT kəsilməsi kimi hadisələrdən müştərilərin daha tez "sağalmasına" kömək etmək üçün Windows əməliyyat sistemində dəyişikliklər etməyi planlaşdırır.

Texnologiya sektorunun ümumi vəziyyəti ilə bağlı qiymətləndirmələr edən Smit, ikinci Tramp administrasiyasının sektora təsirlərini qiymətləndirməyin hələ tez olduğunu bildirib. O, xüsusilə ABŞ-da birləşmə və satınalma qaydalarında mümkün yumşalmaların digər ölkələrdəki ciddi nəzarətlərlə balanslaşdırılmalı olduğunu bildirib.

Smit Bayden administrasiyasını tənqid edib

Həmçinin Smit Bayden administrasiyasının süni intellekt çipləri üzərində ixrac nəzarətini tənqid edib və Amerika rəqəmsal texnologiyalarının, xüsusən də Yaxın Şərq və Afrikaya ixracını sürətləndirməyə çağırıb:

"Amerika texnologiyasının Çin texnologiyası kimi dünyanın digər hissələrinə tez çatmasını təmin etməliyik."

Microsoft-un araşdırmasına görə, şirkətin müştəriləri hər gün 600 milyondan çox kiberhücuma məruz qalır.