Ötən gün ABŞ-da açıqlanan statistik məlumatlar fonunda dollar major valyutalar qarşısında ucuzlaşdı. Qızıl yeni tarixi rekorda qədər bahalaşıb, neftin qiyməti isə ucuzlaşmaqda davam edir. “Bincoin”-in qiyməti də tarixi maksimum səviyyəsinə yaxınlaşır.

EUR/USD valyuta cütlüyü ötən gün əzrində 1.0826 səviyyəsindən 1.0768 səviyyəsinə qədər ucuzlaşsa da, gün sonuna doğru bahalaşıb və hal-hazırda 1.0815 səviyyəsində ticarət olunur. GBP/USD cütlüyü eyni dövr ərzində 1.3020 həddinə qədər bahalaşdı, lakin, bugün səhər saatlarında öz mövqelərindən bir qədər itirərək 1.3000 səviyyəsinə qədər endi. USD/JPY cütlüyü isə 153.000 həddinin üzərində möhkəmlənməyə çalışır.

Qızılın qiyməti bugün tarixi rekordunu yenilədi. Dəyərli metal 2782$ səviyyəsinə qədər bahalaşdı. Çərşənbə axşamı günü “Brent” markalı neftin bir barrel üçün qiyməti 70.70$ səviyyəsinə qədər ucuzlaşıb. Hal-hazırda isə 71.60$ səviyyəsində ticarət olunur. Oktyabrın 29-na keçən gecə “Bitcoin” məzənnəsi 70000$-a çataraq yayın əvvəlindən yeni maksimuma çatdı. Günün sonuna doğru isə 73600$ səviyyəsinin üzərində ticarət edilirdi. Xatırlamaq lazımdır ki, 14 mart 2024-cü ildə kapitallaşmaya görə ən böyük kriptovalyutanın qiyməti tarixi maksimuma çataraq 73777$-a çatmışdı.

Dünən ABŞ-da “Conference Board” analitik şirkəti tərəfindən ölkədə İstehlakçıların İnam İndeksi dərc olunub. Verilən məlumata əsasən, göstərici proqnozları üstələyərək 99.2 bənd səviyyəsindən 108.7 bənd səviyyəsinə qədər yüksəlib. Həmçinin, ölkədə “JOLTS” Boş İşyerləri və Vakansiyalar Hesabatı dərc olunub. Qeyd olunur ki, ölkənin əmək bazarında açıq vakansiyaların sayı 7.861 milyondan 7.443 milyona qədər azalıb. ABŞ-ın ticarət saldosunun kəsiri isə avqust ayı ilə müqayisədə sentyabr ayında 14.1 milyard dollar artaraq 108.23 milyard dollara çatıb.

Bugün Almaniyada dərc olunacaq əsas iqtisadi indikatorlar investorların diqqət mərkəzində olacaq əsas hadisələrdir. Belə ki, Bakı vaxtı ilə saat 13:00-da ÜDM və İşsizlik Səviyyəsi, saat 17:00-da isə İstehlak Qiymətləri İndeksi açıqlanacaq. Eləcə də, Avrozonada illik və rüblük ifadədə ÜDM göstəriciləri dərc olunacaq. Bakı vaxtı ilə saat 16:15-də isə ABŞ-da “Automatic Data Processing” (ADP) analitik şirkəti tərəfindən ölkədə Özəl Sektorda Yeni Yaranan İşyerlərinin Sayı açıqlanacaq.

Məlumat İnvestAZ İnvestisiya Şirkətinin analitikləri tərəfindən hazırlanıb.