Neft və qaz, enerji və su sənayelərində aparıcı xidmət təminatçısı olan "Global Energy Solutions" MMC şirkəti (GLENSOL) 2024-cü ilin ilk 6 ayını (yanvar-iyun) 3 milyon 790 min manat xalis mənfəət ilə başa vurub. Şirkət 2023-cü ilin eyni dövrünü 4 milyon 255 min manat xalis mənfəət ilə bağlamışdı.

Marja.az Şirkətin konsolidasiya edilmiş maliyyə hesabatına istinadən xəbər verir ki, "Global Energy Solutions" şirkətinin cəmi gəlirləri 2023-cü ilin ilk 6 ayı ilə müqayisədə 2024-cü ilin ilk 6 ayında 18 milyon 519 min manat və ya 50,8% artaraq 54 milyon 956 min manat təşkil edib. 

2024-cü ilin birinci yarısında "Global Energy Solutions" şirkətinin vergidən əvvəlki mənfəəti 5 milyon 14 min manat təşkil edib (2023-cü ilin birinci yarısında 4 milyon 744 min manat). Gəlirlərin artmasına baxmayaraq, xərclərin, həmçinin mənfəət vergisi xərcinin artması ilə əlaqədar olaraq Şirkətin xalis mənfəəti aşağı düşüb.

30 İyun 2024-cü il tarixində "Global Energy Solutions" MMC 200 milyon 316 min manat cəmi aktivlərə malik olub. Şirkət 30 İyun 2023-cü il tarixində 140 milyon 569 min manat cəmi aktivlərə malik idi. 

 "Global Energy Solutions" MMC 2023-cü ildə 103 milyon 523 min manat cəmi gəlir, 21 milyon 327 min manat xalis mənfəət əldə etmişdi. 

"Global Energy Solutions" 2012-ci ildən neft, qaz, enerji və su sahələrində sahə işləri və avadanlıqların təmiri sferasında xidmət göstərir.  "Global Energy Solutions" MMC-nin nizamnamə kapitalının 90%-i "Nobel Energy Limitet" şirkətinə (İngiltərə) və 10%-i "Nobel Oil İnvestment (UK) LTD" (İngiltərə) şirkətinə məxsusdur. 

İSTİQRAZ BURAXIR

Xəbər verdiyimiz kimi, "Global Energy Solutions" MMC şirkəti istiqraz buraxılışı yolu ilə 10 milyon manat cəlb etməyə hazırlaşır. Şirkət hər birinin nominal dəyəri 100 manat olan 100 min ədəd faizli, təmin edilməmiş, sənədsiz və adlı istiqraz buraxır. İstiqrazların tədavül müddəti 2 il, illik faiz dərəcəsi 12%-dir. Faiz gəlirləri investorlara hər 3 aydan bir ödəniləcəkdir. Buraxılışın anderrayterinin "PAŞA Kapital İnvestisiya Şirkəti" ASC olacağı gözlənilir.