Asiya İnkişaf Bankı (ADB) Azərbaycanın 2024-cü il üçün iqtisadi artım proqnozunu 1,5 faiz bəndi artıraraq 2,7 faizə yüksəldib.

Bu barədə bankın "Asiyanın İnkişaf Perspektivləri" (ADO) hesabatının sentyabr sayında bildirilir.

ADB-nin apreldə dərc edilmiş hesabatında bu il üçün 1,2 faiz səviyyəsində artım proqnozlaşdırılırdı.

Gələn ildə isə ÜDM-in artım tempi 2,6 faiz səviyyəsində proqnozlaşdırılır.

Bankın analitikləri qeyd edirlər ki, yaxşılaşmanın əsas amilləri qeyri-neft sektorunun artımı, dövlət xərclərinin artması və investisiya fəallığının güclənməsi olub.

2024-cü ilin birinci yarısında qeyri-neft iqtisadiyyatının artımı 6,9 faiz təşkil edib, karbohidrogen sektoru isə daha mütəvazi nəticə - 0,6 faiz göstərib. Eyni zamanda, qaz hasilatının 3,4 faiz artması neft hasilatının 4,9 faiz azalmasını kompensasiya edib. Nəticədə iqtisadi artım 2023-cü ilin birinci yarısındakı 0,5 faizdən 2024-cü ildə 4,3 faizə qədər sürətlənib. Kənd təsərrüfatında isə əksinə, kənd təsərrüfatı məhsullarının istehsalının azalması səbəbindən artım 3,4 faizdən 0,2 faiz-ə qədər yavaşlayıb. Sənaye sektoru 0,9 faiz artım nümayiş etdirib ki, bu da neft-kimya və qida sənayesində istehsalın 7,4 faiz artması hesabına baş verib və 2023-cü ilin birinci yarısında hasilatın 3,7 faiz azalması səbəbindən sənaye istehsalının 1,8 faiz azalmasını kompensasiya edib.

ADB həmçinin qeyd edir ki, investisiyaların əhəmiyyətli artımı tikintidə artım tempinin 2023-cü ilin birinci yarısındakı 9,2 faizdən bir il sonra 18,4 faizə qədər ikiqat artmasına səbəb olub. Xidmət sahəsində artım 1,6 faizdən 6,1 faizə yüksəlib ki, bu da 15,4 faiz artım göstərən nəqliyyat sektorunun inkişafı ilə dəstəklənib.

ADB ekspertləri müsbət dinamikanın ilin sonuna qədər davam edəcəyini gözləyirlər ki, bu da 2024 və 2025-ci illər üçün proqnozların yenidən nəzərdən keçirilməsinə səbəb olub.

Xatırladaq ki, 2023-cü ilin nəticələrinə görə ölkənin ÜDM artımı 1,1 faiz təşkil edib. Hökumətin proqnozlarına görə, 2024-cü ildə ÜDM artımı 4,2 faiz, 2025-ci ildə isə 3,5 faiz səviyyəsində gözlənilir

ADB 2024-cü və 2025-ci illər üçün Azərbaycan üzrə inflyasiya proqnozunu əhəmiyyətli dərəcədə azaldıb

Asiya İnkişaf Bankı (ADB) Azərbaycanda orta illik inflyasiya tempinin 2024-cü il üçün 2,1 %, 2025-ci il üçün isə 3,8 % səviyyəsində proqnozlaşdırıb.

Əvvəlki aprel hesabatında inflyasiya gözləntiləri müvafiq olaraq 5,5 % və 6,5 % səviyyəsində idi.

ADB hesab edir ki, davam edən sərt pul-kredit siyasətinin təsirləri inflyasiyanın azalmasına kömək edib.

“Qlobal əmtəə qiymətlərinin artımının yavaşlaması və Azərbaycanın əsas ticarət tərəfdaşlarında inflyasiyanın azalması, yüksək faiz dərəcələri ilə birlikdə orta illik inflyasiya səviyyəsini 2023-cü ilin birinci yarısındakı 12,7 %-dən bir il sonra 0,7 %-ə endirdi.

Ərzaq qiymətləri 0,6 % azalıb, lakin digər mallarda 1,2 %, xidmətlərdə isə 2,4 % artıb", - hesabatda qeyd olunub.

İnflyasiyanın azalması ilə Azərbaycan Mərkəzi Bankı 2024-cü ilin yanvar ayından iyul ayına qədər dörd mərhələdə əsas faiz dərəcəsini 7,75 %-dən 7,25 %-ə endirib.

Hesabat müəlliflərinin qeyd etdiyi kimi, iyun ayının sonundan yanacağın inzibati qiymətlərinin artırılmasının 2024-cü ilin ikinci yarısında inflyasiyanın artmasına səbəb olacağı gözlənilsə də, ilin birinci yarısında çox aşağı inflyasiyanı nəzərə alaraq illik inflyasiya səviyyəsinin əvvəllər proqnozlaşdırılandan aşağı olacağı gözlənilir. Müvafiq olaraq, ADO-nun aprel sayına nisbətən 2024-cü və 2025-ci illər üçün inflyasiya proqnozları aşağı salınıb.

Xatırladaq ki, 2023-cü ildə Azərbaycanda orta illik inflyasiya 8,8 % təşkil edib.

Hökumətin proqnozlarına görə, Azərbaycanda inflyasiya 2024-cü ildə 2,7 %, 2025-ci ildə isə 4,6 % təşkil edir.

© Report