Xammala qlobal tələbatın azalması ilə bağlı narahatlıqlar fonunda neftin qiyməti enməkdə davam edir. Brent markalı neftin qiyməti 2021-ci ilin sonundan bəri ilk dəfə bir barel üçün 70 dollardan aşağı düşüb.

Marja.az xəbər verir ki, Londonun ICE birjasında Brent markalı neftin noyabr fyuçerslərinin qiyməti 3 faizə yaxın düşərək 69,64 dolları görüb.

Brent nefti 20 dekabr 2021-ci ildən bəri ilk dəfə 70 dollardan aşağı satılır.

Ötən həftə neftin qiyməti təxminən 10% düşüb.

Reuters yazır ki, bu həftə qlobal tələbin zəifləməsi əlamətləri və neftin həddən artıq tədarükü qorxusu fonunda qiymətlər enməyə davam edib. Dünyanın iki aparıcı iqtisadiyyatı - ABŞ və Çin yavaşlamağa davam edir. 

Bundan əlavə, Liviyada neft hasilatının bərpası gözləntiləri bazara mənfi təsir göstərib.

Dünya bazarında qiymətlərin azalması OPEC+ üzvü olan ölkələrin, o cümlədən Rusiyanın oktyabrda başlaması planlaşdırılan hasilat məhdudiyyətlərinin yumşaldılmasını dekabr ayına qədər təxirə salmasına səbəb olub. İştirakçılar gündəlik 2,2 milyon barellik əlavə könüllü hasilatın azaldılmasını 2024-cü ilin noyabr ayının sonuna qədər uzatmaq qərarına gəliblər. 2024-cü il dekabrın 1-dən etibarən bu məhdudiyyətlərin mərhələli şəkildə aradan qaldırılacağı gözlənilir. Eyni zamanda, kartel üzvləri zəruri hallarda düzəlişlərin dayandırılması və ya ləğv edilməsinin mümkünlüyü barədə xəbərdarlıq ediblər.

OPEC+-nın hasilat artımlarına başlamasını iki ay təxirə salmaq qərarı bazardakı enişi dayandıra bilməyib. Ekspertlər qeyd ediblər ki, tarixi məlumatlara əsasən, bazar OPEC+ qərarlarına dərhal reaksiya vermir. Analitiklər hesab edirlər ki, neftin qiyməti əvvəlcə 68-70 dollar/barel aralığına düşəcək və yalnız bundan sonra sabitləşə biləcək. "Bazar Asiyada tələbin mövsümi azalmasına daha çox diqqət yetirir", - ekspertlər əlavə edib.

Çərşənbə axşamı, sentyabrın 10-da OPEC aylıq icmalında bu il əldə edilən məlumatları nəzərə alaraq 2024-cü və 2025-ci illərdə qlobal neft tələbatının artımı ilə bağlı proqnozunu aşağı salıb. Qlobal neft tələbi 2024-cü ildə gündəlik 2,03 milyon barel artacaq ki, bu da ötən ay gözlənilən gündəlik 2,11 milyon barel artımdan aşağıdır. 2025-ci il üçün proqnoz gündəlik 1,78 milyon bareldən 1,74 milyon barrelə endirilib.

OPEC indi qlobal neft istehlakının 2024-cü ildə gündəlik orta hesabla 104,24 milyon barel, 2025-ci ildə isə gündəlik 106 milyon barrelə yüksələcəyini gözləyir. Müqayisə üçün qeyd edək ki, 2023-cü ildə dünya gündəlik 102,2 milyon barel neft istehlak edib.