Dünən ABŞ-da statistik məlumatların dərc olunması fonunda dollar major valyutalar qarşısında bahalaşdı. Amerikada istehlak qiymətləri iyul ayında əvvəlki ay ilə müqayisədə illik ifadədə 2.9% artıb. Bununla da artım 2021-ci ilin mart ayından bəri ən aşağı səviyyədə olub. İyul ayında İstehlak Qiymətləri İndeksi aylıq ifadədə 0.2% təşkil edib.

Həmçinin 2024-cü ilin ikinci rübündə Avrozonanın 20 ölkəsinin ümumi ÜDM-i, ikinci aralıq hesablamaya görə, illik ifadədə 0.6%, rüblük ifadədə isə 0.3% artıb. Avrozonanın Sənaye Sektorunda İstehsal Həcmi iyun ayında illik ifadədə 3.9%, aylıq ifadədə isə 0.1% azalıb. Böyük Britaniyada illik inflyasiya isə iyun ayı ilə müqayisədə iyul ayında 2%-dən 2.2%-ə qədər yüksəlib.

Cümə axşamı günü Yaponiyanın ÜDM-i açıqlanıb. Belə ki, son rübdə ölkə ÜDM-i, ilkin hesablamalara görə, illik ifadədə 3.1% artıb (Əgər ÜDM ardıcıl dörd rüb eyni sürətlə artıbsa). Analitiklər artımın 2.1% olacağını proqnozlaşdırmışdılar. Yaponiyanın Sənaye Sektorunda İstehsal Həcmi isə 4.2% azalıb.

ABŞ-ın kommersiya məqsədli neft ehtiyatları (strateji ehtiyat istisna olmaqla) avqustun 9-da başa çatan həftə ərzində gözlənilmədən 1.357 milyon barrel və ya 0.3% artaraq 430.7 milyon barrelə çatıb.

Bugün ABŞ-da pərakəndə satışların həcminə dair dərc olunacaq göstəricilər investorların diqqət mərkəzində olacaq. Analitiklərin proqnozlarına əsasən, iyun ayı ilə müqayisədə iyul ayında ölkədə pərakəndə satışlar 0.3% artıb. Rəsmi məlumatları ABŞ-ın Ticarət Departamenti Bakı vaxtı ilə saat 16:30-da press-relizdə dərc edəcək.

Həmçinin Böyük Britaniya Milli Statistika Bürosu ölkə ÜDM-i haqqında statistik məlumatları dərc edəcək. Analitiklər Birləşmiş Krallığın ÜDM-nin ikinci rübdə, ilkin hesablamalara görə, illik ifadədə 0.9%, rüblük ifadədə isə 0.6% artdığını ehtimal edirlər. Eyni zamanda ölkənin sənaye istehsalı ilə bağlı məlumatlar dərc ediləcək. 

Əlavə olaraq gün ərzində ABŞ-da işsizlik müavinəti almaq üçün müraciət edənlərin sayı və ölkədə sənaye istehsalı ilə bağlı məlumatlar açıqlanacaq.

Məlumat İnvestAZ İnvestisiya Şirkətinin analitikləri tərəfindən hazırlanıb.