Qlobal birjalarda son vəziyyət

Qlobal birjalarda son vəziyyət

Çərşənbə axşamı günü səhər Almaniyada statistik göstəricilərin dərc olunması ərəfəsində dollar major valyutalar qarşısında bir qədər ucuzlaşıb. EURUSD, GBPUSD və USDJPY valyuta cütlükləri müvafiq olaraq 1.0933, 1.2800 və 147.890 səviyyələrində ticarət olunurlar. Dollar indeksi isə (ABŞ-ın ticarət tərəfdaşları olan altı ölkənin valyuta səbətinə nisbətdə) 103.14 səviyyəsində qərarlaşıb.

Dünən səhər beynəlxalq birjalarda “Brent” markalı neftin bir barrelinin qiyməti avqustun 2-dən bəri ilk dəfə olaraq 80$ həddini ötüb. Hal-hazırda isə “qara qızıl” 82.30$ səviyyəsində ticarət olunur.

Çərşənbə axşamı səhər qızılın qiyməti ABŞ dövlət istiqrazlarının gəlirliliyindəki cüzi artımla bir qədər azalıb. Lakin, dəyərli metalın bir troy unsiyası üçün fyuçers qiyməti 2500$ səviyyəsinin üzərində qalmaqda davam edir. Nyu-Yorkun “Comex” birjasında dekabr ayı üzrə qızıl fyuçerslərinin qiyməti 1 troy unsiyası üçün 3.9$ və ya 0.16% ucuzlaşaraq 2500.1$ olub. Qeyd etmək lazımdır ki, qızılın spot qiyməti bugün 2477$ test edib, lakin, bir qədər ucuzlaşaraq 2463$ həddində qərarlaşıb.

Bugün Avropa İqtisadi Araşdırmalar Mərkəzinin (Zentrum fuer Europaeische Wirtschaftsforschung, ZEW) Almaniya iqtisadiyyatına investorların inamı ilə bağlı hesabatı dərc olunacaq. Analitiklər indeksin 41.8 bənd səviyyəsindən 38 bənd səviyyəsinə qədər enəcəyini proqnoz edirlər.

Həmçinin Bakı vaxtı ilə saat 16:30-da ABŞ-da dərc olunacaq İstehlak Qiymətləri İndeksi göstəricisi investorların diqqət mərkəzində olacaq əsas hadisələrdən biridir.

Məluat İnvest-AZ İnvestisiya Şirkətinin analitikləri tərəfindən hazırlanıb.

13.08.2024 11:37