Azərbaycan Mərkəzi Bankı xam neftin və təbii qazın qiymətləri barədə proqnozlarını açıqlayıb.

Marja-nın məlumatına görə, Mərkəzi Bankda keçirilmiş mətbuat konfransında sədr Taleh Kazımov bildirib ki, 2024-cü ildə xam neftin orta qiymətinin 84,9 ABŞ dolları, 1000 kub metr təbii qazın orta qiymətinin isə 296,1 ABŞ doları olacağı proqnozlaşdırılır. 2025-ci il üçün proqnozlar müvafiq olaraq 83,8 və 332,5 ABŞ dollarıdır. 

GƏLƏN İL PROFİSİTİN 1 MİLYARD DOLLAR AZ OLACAĞINI GÖZLƏYİR

Mərkəzi Bankın baza ssenarisinə görə, cari əməliyyat balansının profisitinin 2024-cü ilin sonunda 7 milyard ABŞ dolları ətrafında, 2025-ci ildə isə 6 milyard ABŞ dolları ətrafında olacağı nəzərdə tutulur. 2024-cü ilin 1-ci rübündə cari əməliyyat balansının profisiti 1,7 milyard ABŞ dolları təşkil edib. 

Taleh Kazımov əlavə edib ki, Mərkəzi Bankın iyun ayında yenilənmiş proqnozlarına əsasən, 2024-cü ildə ümumi daxili məhsulun 3,5%-4% civarında, qeyri-neft ümumi daxili məhsulunun isə 5,5%-6% artacağı gözlənilir. 2025-ci ildə isə ümumi daxili məhsulunn 2% - 2,5% intervalında, qeyri-neft ümumi daxili məhsulunun 4%-5% aralığında artacağı proqnozlaşdırılır. 2024-cü il üzrə proqnozlar Aprel ayı proqnozları ilə eynidir, 2025-ci il üzrə proqnozlar isə azaldılıb. Buna səbəb ev təsərrüfatlarının və dövlət sektorunun xərclərinin artım tempinin azalacağı barədə proqnozdur. 

Yenilənmiş proqnozlara görə mövcud şərtlərin dəyişməz qalacağı təqdirdə baza ssenari üzrə inflyasiyanın 2024-cü ildə 5.4%, 2025-ci illdə isə 5.5% olacağı gözlənilir. İnflyasiya proqnozunun artırılma istiqamətində dəyişdirilməsi əsasən manatın nominal effektiv məzənnəsinin daha aşağı templə möhkəmlənməsi gözləntisi və eləcə də qiymətləri dövlət tərəfindən tənzimlənən məhsul və xidmətlərin qiymət və tariflərində edilən dəyişikliklərlə bağlıdır. Tənzimlənən qiymətlərdə artımın inflyasiya proqnozuna birbaşa və dolayı artırıcı təsiri 1.5 faiz bəndi gözlənilir ki, bunun da 1 faiz bəndi 2024-cü ildə reallaşa bilər. Uçot dərəcəsinin dəyişməz saxlanılması və ya artırılması ilə bağlı növbəti qərarlar faktiki inflyasiya və proqnozu, xarici və daxili risk amillərinin dinamikasından asılı olacaqdır.