2025-ci ilin 01 yanvar tarixinə Azərbaycan Respublikasının xarici dövlət borcunun 5 milyard 214,4 milyon ABŞ dolları, daxili dövlət borcunun isə 19 milyard 310,8 milyon manat olmaqla ümumi dövlət borcunun 28 milyard 175,2 milyon manat təşkil edəcəyi gözlənilir.

Marja.az xəbər verir ki, bu, “2024-cü ilin dövlət və icmal büdcələrinin yarımillik icrasına dair arayış və ilin sonuna gözləntilər sənədi"ndə bildirilir.

Qeyd edilib ki, 2025-ci ilin 01 yanvar tarixinə xarici dövlət borcunun 49,1 faizinin 5 ilədək, 44,7 faizinin 5- 10 il ərzində, 6,2 faizinin isə 10 ildən artıq müddətə kreditorlara ödənilməsi gözlənilir. Xarici dövlət borcu üzrə yeni cəlb olunacaq borc öhdəliklərinin 10 ilədək müddətə təqribən müvafiq istinad dərəcəsi üstəgəl 0,8 faiz dərəcəsi ilə, 10-20 illik müvafiq istinad dərəcəsi üstəgəl 1,0 faiz dərəcəsi ilə, 20 ildən artıq müddətə isə müvafiq istinad dərəcəsi üstəgəl 1,2 faiz dərəcəsi ilə cəlb olunması nəzərdə tutulur.

2025-ci ilin 01 yanvar tarixinə daxili dövlət borcunun 53 faizini daxili maliyyə bazarlarında emissiya olunmuş dövlət istiqrazları təşkil edəcəkdir. İlin sonuna dövriyyədə olan dövlət istiqrazlarının 19,5 faizi 1 illik, 72,6 faizi 2-3 illik, 7,9 faizi isə 5-7 illik istiqrazların payına düşməsi proqnozlaşdırılır.

Qeyd edəki ki, 2024-cü  il 1 yanvar  tarixinə Azərbaycan Respublikasının dövlət  borcu  (daxili  vəxarici  borc) 26 milyard 850,4 milyon manat  və ya 2023-cü  il  üzrə ÜDM-in 21,8 faizini  təşkil etmişdir. Ümumi dövlət borcunun 10 milyard 984 milyon manatı (6 milyard 461,2 milyon ABŞ dolları) və ya  40,9 faizi xarici  dövlət borcunun, 15 milyard 866,4 milyon manatı və ya 59,1 faizi daxili dövlət borcunun payına düşür.

Dövlət büdcəsinin kəsiri

Yenidən baxılma ilə 2024-cü ilin dövlət büdcəsinin kəsiri 764,3 milyon manat artırılaraq 3 milyard 354,3 milyon manat məbləğinə çatdırılmışdır. Kəsirin artımının maliyyələşdirilməsi daxili borclanmadan cəlb olunan vəsait, vahid xəzinə hesabının sərbəst qalığı və Məqsədli Büdcə Fondlarının vəsaitinin qalığı hesabına təmin ediləcəkdir. Kəsirin cari ilin sonuna gözlənilən ümumi daxili məhsula nisbəti 2,8 faiz həcmində olacaqdır.

Dövlət büdcəsinin gəlirləri

2024-cü ilin sonuna dövlət büdcəsinin gəlirlərinin 36 milyard 388 milyon manat təşkil edəcəyi gözlənilir ki, bu da ilkin təsdiq edilmiş proqnoz göstəricisinə nəzərən 6,5 faiz çoxdur. Dövlət büdcəsinin gəlirlərinin 48,8 faizi və ya 17 milyard 769 milyon manatı neft-qaz sektorunun, 51,2 faizi və ya 18 milyard 619 milyon manatı qeyri-neft/qaz sektorunun payına düşür. 2024-cü ilin ilkin proqnoz göstəriciləri ilə müqayisədə neft-qaz sektoru üzrə gəlirlərin 605,0 milyon manat və ya 3,5 faiz, qeyri-neft/qaz sektoru üzrə isə 1 milyard 610 milyon manat və ya 9,5 faiz artması gözlənilir. Bütövlükdə dövlət büdcəsi gəlirlərinin tərkibində qeyri-neft/qaz gəlirlərinin xüsusi çəkisi ilkin proqnoz göstəricisinə nisbətən 1,4 faiz-bənd artaraq 51,2 faiz təşkil edəcək.

Dövlət büdcəsinin xərcləri

2024-cü il dövlət büdcəsinin yenidən baxılmış xərclərinin 39 milyard 742,3 milyon manat səviyyəsində olacağı gözlənilir ki, bu da ilkin proqnoz göstəriciyə nisbətən 8,1 faiz çoxdur. Qeyd olunan 2 milyard 979,3 milyon manat məbləğində xərc artımının maliyyə təminatı 2024-cü il dövlət büdcəsinin gəlirlərinin 2 milyard 215 milyon manat, kəsirinin isə 764,3 milyon manat artırılması hesabına formalaşdırılmışdır. Bununla yanaşı, dövlət büdcəsinin təsdiq olunmuş bəzi xərclərinin optimallaşdırılması hesabına büdcə xərcləri daxilində 851,8 milyon manat məbləğində əlavə maliyyə təminatı yaradılmışdır. Bütövlükdə yaradılmış 3,8 milyard manat məbləğində maliyyə resurslarının 1 milyard 85,8 milyon manatının işğaldan azad olunmuş Qarabağ və Şərgi Zəngəzurda yenidənqurma işlərinin aparılmasına yönəldilməklə cari ildə Böyük Qayıdış Proqramı üçün ayrılan dövlət büdcəsinin vəsaitinin 5 milyard 85,8 milyon manata çatdırılması nəzərdə tutulmuşdur