Azərbaycan Futbol Federasiyaları Assosiasiyası (AFFA) və “Carlsberg Azerbaijan” şirkəti arasında əməkdaşlıq müqaviləsinin imzalanma mərasimi keçirilib. Tədbirdə AFFA-nın icraçı vitse-prezidenti Sərxan Hacıyev, “Carlsberg Azerbaijan”ın baş direktoru Alius Antulis, şirkət rəsmiləri, futbolçular və media nümayəndələri iştirak ediblər.

Müqaviləyə əsasən, “Xırdalan 0.0” alkoqolsuz pivəsi əsas milli komandanın sponsoru olub. Şirkət millinin oyunlarında sponsor qismində çıxış edəcək, eyni zamanda, Azərbaycan futbolunun inkişafına töhfə verəcək müxtəlif sosial kampaniyaların tərəfdaşı olacaq.

“Carlsberg Azerbaijan”ın baş direktoru Alius Antulis tədbirdə çıxış edərək bildirib ki, bu sponsorluqla Azərbaycan futboluna dəstək olacaqlar: “A milli komanda ilə bu gün təməli qoyulan əməkdaşlıqdan çox məmnunuq. “Xırdalan 0.0” yerli arpadan Azərbaycanda istehsal olunan ilk 0.0 alkoqollu pivədir və bu keyfiyyətli məhsulla ölkəmizdə idmanın inkişafını dəstəkləməkdən qürur duyuruq. AFFA-nın prioritetlərinə əsasən, stadionlarda azarkeş sayının artırılması, gənclərdə futbola marağın gücləndirilməsi, sosial layihələrin həyata keçirilməsi üçün birgə çalışacağıq. İnanıram ki, birgə atılan addımlar nəticəsində qısa müddətdə Azərbaycan futboluna böyük töhfə verməyi bacaracağıq”.

AFFA-nın icraçı vitse-prezidenti Sərxan Hacıyev isə hər iki tərəfin bu əməkdaşlıqdan faydalanacağına inandığını söyləyib: “Azərbaycan futbolu üçün əlamətdar günlərdən birini yaşayırıq. AFFA-nın əməkdaşlıq etdiyi şirkətlərin sırasına “Carlsberg Azerbaijan” da qoşulur. Bundan sonra “Carlsberg Azerbaijan”ın “Xırdalan 0.0” pivəsi kişilərdən ibarət A milli komandamızın sponsorlarından biri olacaq. İnanıram ki, bu əməkdaşlıq uzunmüddətli olacaq və hər iki tərəf bundan faydalanacaq”.

AFFA ilə “Carlsberg Azerbaijan” şirkəti arasında sponsorluq müqaviləsi dörd il müddətinə imzalanıb, lakin tərəflər uzunmüddətli əməkdaşlıq niyyətindədirlər.

Qeyd edək ki, milli komandanın yeni sponsoru “Xırdalan 0.0” - pasterizə olunmuş açıq rəngli alkoqolsuz pivədir. Tərkibində konservant yoxdur. Keyfiyyətli xammaldan hazırlanmış zəngin ətirli və nəfis dadlı lager pivəsi “Xırdalan 0.0” artıq istehlakçılara təqdim olunub.

Xatırladaq ki, 1969-cu ildə Xırdalan şəhərində istismara verilən pivəbişirmə zavodu 2008-ci ildən “Carlsberg Group”un bir hissəsinə çevrilib. Hazırda zavodun istehsal gücü ildə 8 mln dekalitr təşkil edir, şirkətin məhsulları isə Azərbaycanın 12,5 mindən artıq ticarət məntəqəsində təqdim olunub. “Carlsberg Azerbaijan” şirkəti büdcəyə illik 35-38 mln manat vergi ödəyir və fəaliyyətə başladığı vaxtdan investisiyalarının həcmi 65 mln manatdan çox təşkil edir.