(®) “Qardaşlar Mebel” QSC-nin rəhbərliyindən ibarət nümayəndə heyəti, Əli Mirzəyev, Hüseyn Mirzəyev, həmçinin şirkətin Amerika Birləşmiş Ştatlarındakı nümayəndəsi Bəxtiyar Məmmədov, dünyanın ən tanınmış Mətbəx və Hamam Assosiyasının dəvəti ilə cari ilin 26-28 fevral tarixlərində ABŞ-nin Las Veqas şəhərində Mətbəx və Hamam Sənayesi Sərgisində (KBİS) iştirak ediblər.

KBİS, Şimali Amerikanın, mətbəx və hamam dizaynının bütün aspektlərinə həsr olunmuş ən böyük ticarət sərgisi olmaqla, yüzlərlə ölkələri təmsil edən sərgi iştirakçısına ən son sənaye məhsullarını, tendensiyalarını, texnologiyalarını nümayiş etdirən stimullaşdırıcı, interaktiv platformadır.

Nümayəndə heyəti tərəfindən sərgi iştirakçılarına “Qardaşlar Mebel” QSC-nin istehsal etdiyi mətbəx və hamam mebellərinə, o cümlədən digər məqsədlər üçün nəzərdə tutulan məhsullara dair təqdimat jurnalları təqdim edilmişdir. Məlumatlar bir çox Amerika, Avropa, Yaxın Şərq və Mərkəzi Asiya ölkələrindən olan ziyarətçilər tərəfindən maraqla və rəğbətlə qarşılanmışdır. “Qardaşlar Mebel” QSC-nin Baş direktoru Əli Mirzəyev sərgi iştirakçılarına, doğma Azərbaycanımız, habelə rəhbərlik etdiyi müəssisə və onun “Made in Azerbaijan” brendi adı altında istehsal və ixrac etdikləri yüksək keyfiyyətli məhsullar haqqında daha dolğun məlumat vemişdir. 

 “Qardaşlar Mebel” QSC-nin təsisçisi Əli Mirzəyev saytımıza verdiyi açıqlamada, sərgidə iştirak etməkdən məmnun olduqlarını, anoloji sahədə dünyanın qabaqcıl şirkətləri keçirilmiş səmərəli və məhsuldar görüşlərin nümayəndə heyətində yüksək təəssürat yaratdığını qeyd etmiş, bununla yanaşı, dünya nəhənglərindən ən son texnologiyalarla təchiz edilmiş yeni avadanlıqların alqı-satqısına, eləcə də yeni coğrafiyalara məhsul ixracına dair bir sıra razılıqların əldə olunduğu müjdəsini vermişdir.

Qeyd edək ki, 2015-ci ildən fəaliyyətə başlamış, ölkədə mebel istehsalçıları arasında özünəməsus yeri olan “Qardaşlar Mebel” QSC ən son texnoloji yeniliklərlə təchiz olunmuş avadanlıqlardan ibarət fabrikə və yeni cağırışlara, beynəlxalq tələblərə uyğun olaraq, öz bilik, bacarıqlarını mütəmadi olaraq təkmilləşdirən 400 nəfərlik peşəkar heyətə malikdir. Müəssisənin  müştəriləri arasında bir sıra dövlət qurumları, öz sahələrində Azərbaycan iqtisadiyyatına əhəmiyyətli dərəcədə töhfə vermiş yerli özəl müəssisələr, eyni zamanda beynəlxalq təşkilatların ölkəmizdəki nümayəndəlikləri vardır. Bununla yanaşı, müəssisə dünyanın müxtəlif böyük ölkələrinə, o cümlədən Amerika Birləşmiş Ştatlarına mebel ixrac edən azsaylı istehsalçılardandır. Bu da, öz növbəsində, müəssisənin istehsal etdiyi mebellərin unikal keyfiyyətindən və beynəlxalq standartlara tam cavab verməsindən irəli gəlir.