İspaniyada fermerlər son iki gündə etirazlarını gücləndirərək, ölkə daxilində bir çox yolu bağlayıb və nəqliyyatın hərəkətini iflic ediblər.

Marja.az xəbər verir ki, fermerlərin sosial media qruplarında mesajlaşaraq təşkil etdiyi etiraz aksiyaları ölkədəki 17 muxtar inzibati bölgədən 10-a təsir edib.

Fermerlər ölkə daxilində 27 mindən çox traktor ilə yollara çıxıb. Ən güclü etirazlar Barselona, ​​Saraqosa, Mursiya, Syudad Real, Kastellon, Kadis, Toledo, Valyadolid, Vitoriya və Logrono şəhərlərində müşahidə olunub.

Bəzi yollarda 20 kilometrə qədər avtomobil növbələrinin yaranmasına səbəb olan etirazlar zamanı, yollarda ocaq yandıran və icazəsiz nümayiş keçirən fermerlər ilə polis arasında vaxtaşırı gərginlik yaşanıb.

Kataloniyalı fermerlər təxminən 1000 traktorla Barselonaya daxil olub və muxtar hökumətin rəsmiləri ilə görüşüblər. İspaniya Milli Nəqliyyatçılar Assosiasiyası da öz açıqlamasında fermerlərin tətili səbəbilə 80 mindən çox yük maşınının yollarda qaldığını açıqlayıb.

Hökumət fermerləri dəstəkləyir

Digər tərəfdən, İspaniyada sol azlıq hökuməti fermerlərin "ədalətli tələbləri" olduğunu və onları dəstəklədiklərini açıqlayıb. Hökumət ölkədəki 140 min fermerə 269 milyon avroluq fövqəladə yardıma başlayacağını və Avropa İttifaqı Komissiyasının 2030-cu ilə qədər pestisidlərin istifadəsini yarıya qədər azaltmaq qərarına yenidən baxacağını açıqlayıb.

Baş nazir Pedro Sançes dünən parlamentdəki çıxışında qida zənciri qanununun gücləndirilməsi və idxala nəzarətin gücləndirilməsi barədə öhdəlik götürüb.

Verilən vədlərdən hələ də əmin olmayan kənd təsərrüfatı sektoru işçilərinə bağlı həmkarlar ittifaqlarının tələbləri aşağıdakılardır:

- AB kənd təsərrüfatı siyasətlərində çeviklik,

- AB-yə daxil olmayan ölkələrdən gələn məhsullara məhdudiyyətlərin qoyulması və daha sərt nəzarətin həyata keçirilməsi,

- Quraqlıq probleminə qarşı yardımın artırılması,

- Tarlalardan bazarlara qədər qida zəncirinə nəzarətin və qanunların gücləndirilməsi,

- Fermerlərin sığorta hüquqlarının genişləndirilməsi.