Qlobal bazarlarda son vəziyyət

Qlobal bazarlarda son vəziyyət

Dünən ABŞ-da statistik məlumatların dərcindən sonra dollar avro, funt və yen qarşısında artım tempini sürətləndirdi, lakin sonra bir qədər ucuzlaşaraq öz mövqelərini itirdi. Hal-hazırda EUR/USD, GBP/USD və USD/JPY valyuta cütlükləri müvafiq olaraq 1.0753, 1.2552 və 148.454 hədlərində ticarət olunurlar. Dollar indeksi (ABŞ-ın ticarət tərəfdaşı olan altı ölkənin valyuta səbətinə nisbətdə) 0.57% artaraq 104.51 bənd təşkil edib.

Təchizat İdarəetmə İnstitutunun (ISM) açıqladığı məlumatlara əsasən, ABŞ-ın xidmət sektoru üzrə PMI göstəricisi dekabr ayında 50.5 bənd səviyyəsindən yanvar ayında 53.4 bənd səviyyəsinə qədər yüksəlib.

Həmçinin dünən dolların bahalaşması fonunda, qızıl 2015$ səviyyəsinə qədər ucuzlaşdı, lakin sonra 2029$-a qədər artım tendensiyası göstərdi. Nyu-Yorkun “Comex” birjasında qızılın aprel fyuçerslərinin qiyməti 1 troy unsiyası üçün 0.85 dollar və ya 0.04% azalaraq 2042$ təşkil edib.

Bazar iştirakçıları geosiyasi amilləri, o cümlədən Yaxın Şərqdəki gərginliyi qiymətləndirməyə davam edirlər. Bunun fonunda ənənəvi olaraq “güvənli liman” olan qızıla tələbin artdığını görə bilərik. Qızıl üçün ABŞ Federal Ehtiyatlar Sisteminin (FED) monetar siyasəti digər mühüm amil kimi qalmağa davam edir. “CME Group”-un məlumatına əsasən, analitiklərin təxminən 83%-i FED-in mart ayında faiz dərəcəsini yenidən olduğu səviyyədə saxlayacağını və əsasən azalmanın may ayı üçün baş tutacağını proqnozlaşdırır.

Eləcə də, bugün Böyük Britaniyadan və Kanadadan açıqlanacaq statistik məlumatlar investorların diqqət mərkəzində olacaq əsas hadisələrdir.

Məlumat İnvest-AZ İnvestisiya Şirkətinin analitikləri tərəfindən hazırlanıb.

06.02.2024 11:32

📲 İndi
Marja.az-ın Telegram kanalına qoşulun və xəbərlər cibinizə gəlsin.

♦️ Ən son və vacib iqtisadi xəbərlər üçün Marja - Biznes və Maliyyə Xəbərləri Portalı
♦️ Ən mühüm xəbərlər üçün Marja.az