Bu il 30 yaşı tamam olmuş "R.İ.S.K. Elmi İstehsalat Şirkəti" inkişafının keyfiyyətcə yeni mərhələsinə keçidi təmin edəcək strategiya hazırlamaqdadır.

Şirkətdən Marja.az-a daxil olmuş məlumatda bildirilir ki, 2023-cü illə vidalaşma ərəfəsində "R.İ.S.K. Elmi İstehsalat Şirkəti" QSC-də  ötən 30 illik fəaliyyətin nəticələrinə yekun vurulmuş və növbəti inkişaf səviyyəsinə keçidi təmin edəcək yanaşmalar formalaşdırılması qərarı verilmişdir. Bu yanaşmalar əsasında isə şirkətin “Yeni İnkişaf Strategiyası” (YİS) hazırlanacaqdır.  YİS-ın özək ideyası - şirkətin mövcud potensialını keyfiyyətcə yeni səviyyədə açmaq və eyni zamanda, biznesin inkişafı üçün yeni imkanlar yaratmaqdır.

Qeyd edilib ki, ötən 30 il ərzində şirkətin fəaliyyətində sütun rollar oynamış əməkdaşların öz bilik və təcrübəsini yeni nəslə harmonik ötürməsi və beləliklə də gənc kadrların idarəçilik missiyasına uğurla qoşulması YİS-in əsas elementlərindən biri olacaqdır. Bunun üçün vacib zəmin kimi şirkət innovativ və çevik yanaşmalar tətbiq etməklə inzibatçılığı təkmilləşdirilməlidir. Nəsildəyişmə prosesini təmin edəcək bu kimi addımlar YİS-in vacib elementləri olacaqdır.

Diqqət mərkəzində duran digər bir məsələ şirkətin mövcud resurslarına (insan resursları, istifadə olunan biznes aparma üsulları və sair) yeni nəzər salmaqla, ilk baxışdan gizli olan inkişaf potensialının aşkarlanması və sərrast reallaşmasıdır. Bu tədbirlər sırasına həmçinin şirkət strukturunun təkmilləşdirilməsi, səhm kimi alətlərdən daha çevik və məqsədyönlu istifadə olunması da daxildirlər. Bu istiqamətdə atılacaq addımlardan biri kimi, şirkət, səhmlərinin nominal dəyərinin azaltmaq, əvəzində isə onların sayını artirmaq üçün müvafiq tədbirlər görməkdədir.

"Məlumdur ki, əməkdaşların iş prosesindən aldıqları maddi və mənəvi məmnunluq, müştəri məmnunluğunu şərtləndirən və nəticədə uğurlu fəaliyyəti təmin edən ciddi faktorlardan biridir. Birgə fəaliyyətin yüksək multiplikativ effektini təmin etmək üçün, qüvvədə olan korporativ qayda və prosedurlar müvafiq islahat süzgəcindən keçirilməlidirlər. Bu cür islahatlar nəticəsində yaradılacaq işgüzar mühit həm mövcud mütəxəssislərin potensialını artırmalı, həm də yeni kadrların yetişdirilməsinə xidmət etməlidir",- məlumatda bildirilir. 

Həmçinin məlumatda qeyd olunub ki, özünü doğrultmuş iş ənənələri ilə qabaqcıl iş təcrübəsinin vəhdəti,  yaradıcı “qaydasızlıqla” səmərəli bürokratiyanın sərrast tətbiqi, fərdi və korporativ maraqların uzlaşdırılması, iri şirkət əzəməti və start-up çevikliyinin bir-birini gücləndirməsi – aparılacaq islahatların fokuslandığı əsas məqamlardır. Nəticədə şirkət, ixtisaslaşdığı sahələrdə liderliyini qoruyub saxlamqla bərabər, müasir İT bazarının trendlərinə vaxtında və rəqabətədavamlı  “cavablar” verə bilmək qabiliyyəti kəsb edəcəkdir. Bütün bunlar YİS-in məqsədləri sırasındadırlar.

İT sistem inteqrasiyası, kiber-təhlükəsizlik, tətbiqi proqram təminatı istehsalı, coğrafi informasiya sistemlərinin (GIS) yaradılması kimi istiqamətlərdə ixtisaslaşmış, sifarişçiləri iri telekommunikasiya şirkətləri, dövlət qurumları, neft-qaz, bank-maliyyə, tikinti-nəqliyyat sektorları olan R.İ.S.K. Elmi İstehsalat Şirkəti YİS-lə silahlanaraq növbəti 10 illik “səyahətinə” yollanacaq.