“Azərbaycan Sənaye Korporasiyası” ASC 2022-ci ili  46 milyon manat xalis mənfəət ilə başa vurub. Şirkət 2021-ci ili 44 milyon manat xalis mənfəəti ilə bağlamışdı.

Marja xəbər verir ki, bu, ASC-nin yaydığı məlumatda bildirilir.

Qeyd edilib ki, “Azərbaycan Sənaye Korporasiyası” ASC yarandığı tarixdən ən yüksək maliyyə nəticələrinə nail olaraq 2022-ci ili uğurla başa vurmuşdur: "Regional münaqişələr səbəbindən yaranmış enerji böhranı, təchizat zəncirlərindəki qırılmalar, iqlim dəyişiklikləri, qlobal iqtisadi fəallığın azalması və digər amillər Korporasiyaya daxil olan müəssisələrin təsərrüfat fəaliyyətinə mənfi təsir göstərsə də, yekun nəticədə Korporasiya qarşıya çıxan çətinlikləri aradan qaldıraraq 2022-ci ildə qoyulmuş vəzifələri uğurla icra edə bilmişdir. 2022-ci ilin audit olunmuş maliyyə hesabatlarına əsasən ümumi gəlirlər üzrə 437 milyon manat, Vergi, faiz üzrə xərclər və amortizasiya ayırmaları çıxılmazdan əvvəlki mənfəət (EBİTDA) üzrə 80 milyon manat, xalis mənfəət üzrə isə 46 milyon manat nəticə əldə edilmişdir. Maliyyə hesabatları "Baker Tilly Audit Azərbaycan" MMC tərəfindən yoxlanılmış və hesabatlara müvafiq rəy verilmişdir".

Qeyd edilib ki, ölkənin alüminium sənayesinin inkişaf etdirilməsi Korporasiyanın əsas fəaliyyət sahələrindən biri sayılır. 2022-ci ildə bu istiqamət üzrə 49.8 min ton məhsul istehsal edilmişdir. Külçə satışı 25.7 min ton, istiyayma rulonlarının satışı 9.6 min ton, soyuqyayma rulonlarının satışı isə 14.5 min ton təşkil etmişdir.

Korporasiyanın digər əsas fəaliyyət sahəsini pambıqçılığın inkişafı təşkil edir. Fermerlərdən tədarük edilmiş 78554 ton xam pambıqdan 2022-ci ildə 34371 ton mahlıc, 42249 ton texniki çiyid və digər yan məhsullar istehsal edilmiş, il ərzində 21169 ton mahlıc və 35887 ton texniki çiyidin satışı həyata keçirilmişdir.

Əlavə edilib ki, son üç il ərzində maliyyə nəticələrində müsbət dinamikaya nail olunmuşdur. Belə ki, Korporasiyanın ümumi gəlirləri 2020-ci ildə 278.9 milyon manat, 2021-ci ildə 429 milyon manat, 2022-ci ildə isə 437 milyon manat təşkil etmişdir. Vergi, faiz üzrə xərclər və amortizasiya ayırmaları çıxılmazdan əvvəlki mənfəət (EBİTDA) üzrə 2020-ci ildə 18.3 milyon manat, 2021-ci ildə 84 milyon manat, 2022-ci ildə 80 milyon manat, xalis mənfəət üzrə isə 2020-ci ildə -2,8 milyonmanat (zərər), 2021-ci ildə 44 milyon manat, 2022-ci ildə 46 milyon manat nəticə əldə edilmişdir.

Həmçinin oxu

Azərbaycanın iri alüminium şirkətinin xalis mənfəəti azalıb