Greenspan "istiqraz şarı" xəbərdarlığı edib

Keçmiş Fed sədri Alan Greenspan, səhmlərdə ucuzlaşma gözləntisi içərisində olanların istiqraz qiymətləri barədə narahat olmalarının daha yaxşı olacağını bildirib. 

"Marja" xəbər verir ki, Greenspan-a görə, istiqraz bazarında "şar" yaranıb və bu "şar"ın partlaması hamı üçün "pis" olacaq.

 
"Hər cəhətdən, uzunmüddətli faizlər (Mərkəzi Bankın faizləri) həddindən artıq aşağıdır və davam etdirilə bilinməz. Faizlər qalxdıqları zaman sürətli bir hərəkət olacaq. Səhmlərin qiymətlərində deyil, istiqraz qiymətlərində bir "şar"ın içərisindəyik" deyib.

Qeyd edək ki, başda ABŞ Mərkəzi Bankı Fed olmaqla bir sıra mərkəzi banklar iqtisadiyyatı canlandırmaq üçün, aşağı faiz və təşviq siyasətləri çərçivəsində trilyonlarla dollar qiymətli kağılzar alıblar. Alışların artması istiqraz qiymətlərini yüksəldib.

Greenspan mərkəzi banklarının monetar genişlənmə (QE -monetar təşviq) dövrünün başa çatması ilə faizlərin sürətlə yüksələcəyi xəbərdarlığını edən tək şəxs deyil. "Deutsche Bank AG"dən Binky Chadha, ABŞ xəzinə istiqrazlarının real faizlərinin iqtisadi inkişafın işarə etdiyi səviyyədən çox aşağı olduğunu bildirmişdi. "RBC Capital Markets"in baş iqtisadçılarından Tom Porcelli, inflyasiya təzyiqlərinin istiqraz bazarını vurmasının an məsələsi olduğu barədə xəbərdarlıq edib.

"Aşağı iqtisadi artım və yüksələn inflyasiya" -Keçmiş Fed Sədri Alan  Greenspan-a görə ABŞ iqtisadiyyatını gözləyən vəziyyət budur.

 
Greenspan, Bloomberg-ə verdiyi müsahibədə bildirib ki, əslində inflyasiyanın yüksəlməsi iqtisadi atıma təkan verməlidir. Hazırda ABŞ-da isə inflyasiya yüksəldikcə iqtisadi artım aşağı düşür. Başqa sözlə,üfüqdə staqflyasiya görünür və bu ABŞ iqtisadiyyatı üçün yaxşı xəbər deyil.

Staqflyasiya - Milli istehsalın ciddi şəkildə aşağı düşməsi nəticəsində makroiqtisadi qeyri-tarazlıq, o cümlədən yüksək işsizlik və inflyasiya səviyyəsi ilə müşahidə olunan iqtisadi durum, vəziyyət. 

Staqflyasiya baş verən zaman ölkədə həm iqtisadi durğunluq, həm də qiymətlərin qalxması müşahidə edilir. Staqflyasiya, yəni durğunluq və inflyasiyanın birləşməsi anlamına gəlir.