“SOCAR-Polymer” sifariş yığmağa çalışır

“SOCAR-Polymer” sifariş yığmağa çalışır

İyulun 28-də Bakı Biznes Mərkəzində İqtisadiyyat Nazirliyinin təşkilatçılığı ilə “Yerli istehsalın dəstəklənməsi istiqamətində müəssisələrarası əlaqələrin qurulması” mövzusunda tədbir keçirilib.

VTB-də minimal faiz dərəcəsi ilə nağd kredit 9.9%-dən

Tədbirdə Sumqayıt Kimya Sənaye Parkının rezidenti - “SOCAR Polymer” MMC-nin istehsal edəcəyi məhsulların sahibkarlar tərəfindən xammal kimi istifadə imkanlarından geniş bəhs edilib, ixrac potensialının genişlənməsində, yeni iş yerlərinin açılmasında müəssisənin əhəmiyyəti vurğulanıb.

“SOCAR Polymer” MMC-nin direktoru Fərid Cəfərov qeyd edib ki, hazırda ölkəmiz aşağı sıxlıqlı polietileni ixrac, yüksək sıxlıqlı polietileni isə idxal edir. “SOCAR Polymer” layihəsinin əsas məqsədi bu sahədə idxalın aradan qaldırılmasıdır. İstehsal ediləcək məhsulların daxili bazarla yanaşı, Türkiyə və Avropa bazarlarına çıxarılması planlaşdırılır. 2018-ci ilin əvvəlinə Kanada texnologiyası əsasında illik istehsal gücü 180 min ton polipropilen və Avstriya texnologiyası əsasında illik istehsalı gücü 120 min tonluq yüksək sıxlıqlı polietilen olan istehsal xətlərinin istismara verilməsi nəzərdə tutulur. Xammal olaraq “Azərkimya” İstehsalat Birliyinin istehsal etdiyi propilen və etilendən istifadə olunacaq. Müəssisənin tikintisində 3 minə yaxın işçi çalışır.

Tədbirdə İqtisadi İslahatlar Elmi-Tədqiqat İnstitutunun direktoru Vilayət Quliyev “SOCAR-Polymer” MMC-nin əhəmiyyətini vurğulayaraq, gələcəkdə həmin müəssisənin ətrafında klasterlərin yaradılması imkanları barədə danışıb.

Sonra sahibkarlarla "SOCAR Polymer"in məhsullarından istifadə imkanlarına dair müzakirələr aparılıb, onları maraqlandıran suallar cavablandırılıb.

28.07.2017 15:00