Türkiyənin Kənd Təsərrüfatı Sığortası Hovuzu (TARSİM) təşkilatının İdarə Heyətinin sədri Osman Yıldızın rəhbərliyi ilə TARSİM nümayəndə heyəti oktyabrın 1-də Azərbaycana səfərə gəlib. 

1-5 oktyabr tarixlərində davam edəcək səfər zamanı nümaynədə heyətinin Aqrar Sığorta Fondu, Azərbaycan Respublikasının Kənd Təsərrüfatı Nazirliyi, Azərbaycan Respublikasının Mərkəzi Bankı, Azərbaycanda aqrar sığorta sisteminə üzv olan sığorta şirkətlərində və sair qurumlarda görüşləri nəzərdə tutulur. 

Səfər zamanı Kənd Təsərrüfatı Sığortası Hovuzu (TARSİM) təşkilatı ilə Azərbaycanın Aqrar Sığorta Fondu arasında əməkdaşlığın genişləndirilməsi, Azərbaycanın işğaldan azad olunan ərazilərinin inkişafında aqrar sığortanın rolu, aqrar sığorta mexanizmininin tətbiqi üzrə Azərbaycan təcrübəsinin digər ölkələrdə tətbiqi məsələləri müzakirə ediləcək. 

Səfərin ilk iş günü, oktyabrın 2-də Aqrar Sığorta Fondunda Türkiyənin Kənd Təsərrüfatı Sığortası Hovuzu (TARSİM) təşkilatının sədri Osman Yıldızın rəhbərliyi ilə nümayəndə heyəti və Aqrar Sığorta Fondunun (ASF) idarə heyətinin sədri Fuad Sadıqovun rəhbərliyi ilə ASF nümayəndələri arasında görüş keçirilib. 

Görüşdə Azərbaycanda TARSİM-in dəstəyi ilə tətbiq edilən aqrar sığorta mexanizminin fəaliyyəti, əldə edilən nəticələr və planlar müzakirə edilib. Aqrar Sığorta Fondunun idarə heyətinin sədri Fuad Sadıqov sistemin fəaliyyətə başladığı 3 il ərzində Fondun yığımlarının və ödənişlərinin sürətlə artdığını, əhatə dairəsinin genişləndiyini qeyd edib. Onun sözlərinə görə, hazırda Aqrar Sığorta Fondu tərəfindən 420 min hektardan artıq əkin sahəsi sığortalanıb ki, bu da ölkədəki bütün əkin sahələrinin 25%-i deməkdir. 2022-ci ildə Aqrar Sığorta Fondu tərəfindən 2,4 milyon manat ödəniş edildiyini xatırladan Fond sədri, 2023-cü ildə baş verən sığorta hadisələrinin sayının kəskin artdığını və buna uyğun olaraq sığorta ödənişlərinin məbləğinin də bir neçə dəfə yüksələcəyini bildirib. 

Fond rəhbəri qarşıdakı dövrdə aqrar sığortaya yeni risklərin, o cümlədən quraqlıq risklərinin əlavə edilməsi ilə bağlı ilkin müzakirələrin və hesablamaların aparıldığını qeyd edib. 

Türkiyənin Kənd Təsərrüfatı Sığortası Hovuzu (TARSİM) təşkilatının İdarə Heyətinin sədri Osman Yıldız Azərbaycanla Türkiyə arasında aqrar sığorta sektorunda əməkdaşlığın genişləndiyini, Azərbaycanda aqrar sığorta mexanizminin uğurla tətbiq edildiyini bildirib.  Onun sözlərinə görə, artıq digər ölkələrdə aqrar sığorta mexanizminin tətbiqində Azərbaycan təcrübəsindən istifadə etmək mümkün olacaq və ümumilikdə Türk Dövlətləri arasında ümumi aqrar sığorta sisteminin qurulması məsələsi müzakirə edilir. 

TARSİM İdarə Heyəti sədrinin müavini Fatma Ebru Gençosmanoğlu bildirib ki, səfər zamanı, iki ölkə arasında qarşılıqlı təcrübə mübadiləsi, Azərbaycanda Sığorta Məlumat Mərkəzinin yaradılması, eləcə də sığorta ekspenrtlərinin sertifikatlaşdırma prosesinə dəstək məsələləri müzakirə ediləcək. Bununla bağlı TARSİM nümaynədə heyətinin Azəbaycan Mərkəzi Bankında təqdimatı gözlənilir. 

Səfər zamanı 4 oktyabr tarixində Gəncədə Azərbaycan Dövlət Aqrar Universitetində «Türkiyə və Azərbaycan aqrar sığorta sistemlərinin təqdimatı» mövzusunda tədbir keçiriləcək.