Azərbaycan Dövlət İqtisad Universiteti (UNEC) və “McDonald’s Azərbaycan” şirkətinin əməkdaşlığı çərçivəsində maliyyə yardımı göstərilən fiziki imkanları məhdud olan tələbələrlə görüş keçirilib.

Görüşdə “McDonald’s Azərbaycan” şirkətinin baş direktoru Oskar Boqopolskiy də iştirak edib. Keçirilən görüşdə dəstək olunan tələbələrlə fikir mübadiləsi aparılıb.

Ali təhsilin və özünüinkişafın vacibliyini qeyd edən O.Boqopolskiy gələcəkdə də belə görüşlərin keçiriləcəyini bildirib. O, həmçinin şirkətin tələbələrə təhsillərində dəstəyi davam etdirmək istəyini bir daha təsdiqləyib.

İqtisad Universitetində marketinq ixtisası üzrə təhsil alan Rəşad Hüseynzadə deyib:

“Təqaüdün bizə göstərdiyi imkanlarla biz öz maliyyəmizi daha çox özümüzü inkişafa, xarici dil bilikərimizi inkişaf etdirməyə yönəldə bildik. Bu bizə, tək maliyyə tərəfdən yox, eyni zamanda mənəvi tərəfdən də dəstək oldu. Ümid edirəm ki, belə dəstək layihələrinin əhatəsi daha da genişlənər. Bu, tələbələrin inkişafına böyük dəstək ola bilər”.

Layihə çərçivəsində təhsilhaqqı qarşılanan və ötən il məzun olan biri - Əhməd Abdullayev bildirib ki, o, hazırda Litvanın Vilnus Universitetində magistraturada təhsili alır.

“Belə dəstək layihələri tələbələrin müəyyən nüfuza sahib olmasına gətirib çıxarır. Görüşdə “McDonald’s”ın nümayəndələri ilə səmimi söhbətimiz oldu. Bizim fikirlərimizi dinlədilər, suallarımıza cavab verdilər. Bu maliyyə dəstəyi olduqca önəmlidir, bu layihədə iştirak edənlər də böyük uğurlara nail olacaqlar”.

Azərbaycan Dövlət İqtisad Universitetinin Maliyyə ixtisası üzrə 2023-cü ildə məzun olan Nəzrin Abbaslı bildirib:

“Universitetimizlə “McDonald`s”şirkətinin əməkdaşlığı nəticəsində həyata keçirilən bu layihənin qaliblərindən biri olduğum üçün çox şadam. Çünki bu layihə sayəsində təhsilhaqqı ödənişinin bir qismindən azad olarkən özümü universitet dərslərindən əlavə də inkişaf etdirməyim üçün şans yarandı. Bu fürsəti dəyərləndirərkən həm öz üzərimdə daha çox işləyə bildim, həm də ailəmin üzərinə düşən yükün yüngülləşdiyinin şahidi oldum.

McDonald’s şirkətinin rəhbərliyi ilə keçirilən görüşün də bizə böyük qatqısı olduğunu bariz şəkildə deyə bilərəm. Proqram iştirakçılarının suallarının daha dərindən cavablandırılması, xidmət sektorunun nə dərəcədə mürəkkəb və diqqət tələb edən sahə olsa da ölkədə bunlara əməl edildikdə inkişafın necə irəlilədiyini göstərdi”.

Qeyd edək ki, UNEC-in rektoru, professor Ədalət Muradov və “McDonald’s Azərbaycan” şirkətinin baş direktoru Oskar Boqopolskinin 2021-ci ildə imzaladığı Memoranduma əsasən, tərəflər tələbələrin müxtəlif istiqamətlər üzrə biliklərinin inkişaf etdirilməsi, praktiki proqramların təşkili, təlim xərclərinin ödənilməsi, həmçinin sertifikatlaşdırmadan keçmə kimi məsələlərdə əməkdaşlığa başlayıblar.

Memorandumun müddəalarının icrası çərçivəsində fiziki imkanları məhdud tələbələrə maliyyə yardımının göstərilməsi layihəsinə başlanılıb. Belə ki, müəyyən meyarlara uyğun olaraq, 15 namizəd arasından 5 UNEC tələbəsi seçilib və onlara maliyyə yardımı göstərilib. “McDonald’s Azərbaycan” şirkəti onların təhsil haqqını tam ödəyib və gələcəkdə də tələbələrə maddi dəstək verməyə davam etmək niyyətindədir.