Son zamanlarda sosial şəbəkələrdə və mediada “TESS” markasına məxsus çaylardan qurd çıxması ilə bağlı yayımlanan xəbərlər haqqında istehsalçı fabrik tərəfindən rəsmi açıqlama verilib. 

Marja.az-ın məlumatına görə, “TESS” çaylarının istehsalçısı olan “Orimi” şirkətlər qrupunun məlumatında bildirilir ki, istehlakçıların qurd olduğunu düşündüyü əslində çayın tərkibindəki kapsullaşdırılmış aromatizatorlardır: 

““Orimi” şirkətlər qrupunun bəzi məhsullarında, xüsusilə “TESS” çaylarında unikal dad və ətir əldə etmək üçün qida aromatizatorlarından istifadə olunur. Məhsulun tərkibində Rusiya Federasiyası və Avrasiya İqtisadi İttifaqı tərəfindən müəyyən edilmiş normalara uyğun olaraq aromatizatorların mövcud olması qutunun üzərində hər zaman qeyd olunur. “Orimi” şirkətlər qrupu tərəfindən istifadə olunan aromatizatorlar Avropa, Avrasiya İqtisadi İttifaqı, Rusiya Federasiyası, Asiya ölkələri və ABŞ-da qəbul edilmiş bütün təhlükəsizlik tələblərinə uyğundur. “Orimi” qida texnologiyaları sahəsində dünyanın aparıcı istehsalçıları ilə çalışır.

Hazırda qida sənayesində 3 növ qida aromatizatorlarından istifadə olunur: qranula (toz), maye və kapsullaşdırılmış. “TESS” çaylarının istehsalı zamanı kapsullaşdırılmış formada aromatizatorlardan istifadə olunur. Kapsullar qida inqrediyentlərindən hazırlanır və məhsulun ətrinin qalıcı olması üçün optimal vasitə hesab olunur. Bu kapsullar yalnız dəmləmə zamanı açılır və məhsulun son istifadə tarixinə qədər öz xüsusiyyətlərini itirmir. 

Beləliklə, istehlakçıların qurd olduğunu düşündüyü əslində çayın tərkibindəki kapsullaşdırılmış aromatizatorlardır. Bundan əmin olmaq üçün çay paketindəki çayın üzərinə isti su əlavə etmək kifayətdir. Bu zaman aromatizator tamamilə həll olacaq.

Fabrikin bütün məhsulları “Qida məhsullarının təhlükəsizliyi”, “Qida məhsullarının etiketlənməsi”, “Qida əlavələrinin, aromatizatorların və texnoloji köməkçi maddələrin təhlükəsizlik tələbləri” haqqında qanunvericilik sənədlərinə tam uyğun şəkildə istehsal olunur”, - açıqlamada bildirilir.

Qeyd edək ki, bir sıra saytların yaydığı xəbərdə bildirilmişdi ki, Bakıda marketdən alınan onlarla “TESS” çay paketinin içərisindən qurd çıxıb. Qeyd edilmişdi ki, bununla bağlı vətəndaşlar şikayət edib. Şikayətçilərin sözlərinə görə, Bakıda marketlərdən alınan “TESS” çaylarının  içərisində qurdlar var. Şikayətçilər Bakıdakı əksər marketlərdən alınan “TESS” çaylarında oxşar halla qarşılaşdıqlarını bildirmişdilər.

Rusiya istehsal olan “TESS” çaylarını Azərbaycana Veysəloğlu Şirkətlər Qrupu idxal edir və  marketlərə satışa verir.