Azərbaycanın qiymətli kağızlar bazarında fəaliyyət göstərən 13 investisiya şirkətinin 2022-ci ildə məcmu xalis mənfəəti 8,575 milyon manat təşkil edib.

Bu, 2021-ci illə müqayisədə 10,4 % çoxdur.

İnvestisiya şirkətlərindən 4-ü – “Capital Partners”, “MFX-Trading”, “Plato Capital and Co.” və “Troni” ötən ili zərərlə başa vurub. Hesabat dövründə “MFX-Trading” və “Troni”nin zərəri artıb, “Plato Capital and Co.”nun zərəri azalıb, “Capital Partners” isə mənfəətdən zərərə keçib. Həm ötən ili, həm də əvvəlki ili mənfəətlə başa vurmuş 9 investisiya şirkətindən isə 4-ü – “ABB-İnvest”, “CPM-İnvest”, “İnvest-AZ” və “PAŞA Kapital” mənfəətini artırıb, qalanları isə azaldıb.

Ötən il investisiya şirkətlərinin vergiyəqədərki mənfəəti 10,927 milyon manat olub ki, bu da əvvəlki ilə nisbətən 12 % çoxdur. Maliyyə qurumlarının ayrı-ayrılıqda vergiyəqədərki mənfəətlə bağlı vəziyyəti xalis mənfəətdə olduğu kimidir.

2021-ci ildə investisiya şirkətlərinin məcmu mənfəət vergisi ödəmələri isə 2,351 milyon manat təşkil edib. Bu da illik müqayisədə 18 % çoxdur. İnvestisiya şirkətlərindən 4-ü – “Capital Partners”, “MFX-Trading”, “Plato Capital and Co.” və “Troni” ötən ili zərərlə başa vurduqları üçün vergi ödəməyiblər. Həm ötən il, həm də əvvəlki il vergi ödəmiş 9 investisiya şirkətindən 3-ü - “CPM-İnvest”, “İnvest-AZ” və “PAŞA Kapital” vergi ödəmələrini artırıb, qalanları isə azaldıb.

Azərbaycandakı investisiya şirkətlərinin məcmu aktivləri 30 % artıb

Azərbaycanın qiymətli kağızlar bazarında fəaliyyət göstərən 13 investisiya şirkətinin bu il yanvarın 1-nə məcmu aktivləri 242,182 milyon manat təşkil edib. Bu, ötən il yanvarın 1-i ilə müqayisədə 30,2 % çoxdur.

Hesabat dövründə investisiya şirkətlərindən 4-ü – “ABB-İnvest”, “MFX-Trading”, “Plato Capital and Co.” və “PSG Kapital” aktivlərini azaldıb, qalanları isə artırıb.

Ötən ilin sonuna investisiya şirkətlərinin məcmu öhdəlikləri 203,146 milyon manat olub ki, bu da əvvəlki ilin sonuna nisbətən 33,9 % çoxdur. Maliyyə qurumlarından 4-ü – “ABB-İnvest”, “Plato Capital and Co.”, “PSG Kapital” və “Xalq Kapital” öhdəliklərini azaldıb, qalanları isə artırıb.

Hesabat tarixinə investisiya şirkətlərinin məcmu balans kapitalı isə 39,037 milyon manat təşkil edib. Bu da illik müqayisədə 13,9 % çoxdur. Maliyyə qurumlarından 4-ü – “MFX-Trading”, “Plato Capital and Co.”, “PSG Kapital” və “Unicapital” balans kapitalını azaldıb, qalanları isə artırıb.

Bu il yanvarın 1-nə investisiya şirkətlərinin məcmu nizamnamə kapitalı isə 18,49 milyon manat olub. Bu isə ötən il yanvarın 1-nə nisbətən 7,3 % çoxdur. Maliyyə qurumlarından 4-ü – “Capital Partners”, “İnvest-AZ”, “MFX-Trading” və “Troni” nizamnamə kapitalını artırıb, qalanları sabit saxlayıb.

© "Report"