"Azərbaycan Sənaye Bankı" ASC 2022-ci il üzrə maliyyə göstəricilərini açıqlayıb.

Marja.az xəbər verir ki, "Azərbaycan Sənaye Bankı" 2022-ci ili 5 milyon 286 min manat xalis mənfəət ilə başa vurub. Bank 2021-ci ili 2 milyon 229 min manat xalis mənfəət ilə bağlamışdı. Beləliklə, "Azərbaycan Sənaye Bankı"nın xalis mənfəəti 2021-ci illə müqayisədə 2022-ci ildə 3 milyon 57 min manat və ya 2,4 dəfə artıb. Xalis mənfəətin artması gəlirlərin artmasından qaynaqlanır.

2022-ci ildə "Azərbaycan Sənaye Bankı" ASC-nin cəmi əməliyyat gəlirləri (faiz və qeyri-faiz gəlirləri) 35 milyon 611 min manat təşkil edib. 2021-ci ildə Bankın cəmi əməliyyat gəlirləri 32 milyon 821 min manat təşkil etmişdi.

2022-ci ildə "Azərbaycan Sənaye Bankı" ASC-nin cəmi əməliyyat xərcləri (faiz və qeyri-faiz xərcləri) 30 milyon 368 min manat təşkil eedib. 2021-ci ildə Bankın cəmi əməliyyat xərcləri 29 milyon 981 min manat təşkil etmişdi. 

2021-ci ildə "Azərbaycan Sənaye Bankı"nın əməliyyat mənfəəti 2 milyon 831 min manat ikən, 2022-ci ildə 5 milyon 173 min manat təşkil edib. 

BANK KİÇİLİB 

31 dekabr 2022-ci il tarixində "Azərbaycan Sənaye Bankı" ASC 747 milyon 621 min manat cəmi aktivlərə, o cümlədən 241 milyon 596 min manat kredit portfelinə (müştərilərə verilmiş kreditlər) malik olub. Bank 2021-ci ilin sonunda 812 milyon 561 min manat cəmi aktivlərə, o cümlədən 243 milyon 593 min manat kredit portfelinə malik idi. 

 "Azərbaycan Sənaye Bankı"nın digər banklar da daxil olmaqla, maliyyə institutlarındakı depozitləri 467 milyon 295 min manatdan 403 milyon 758 min manata geriləyib.

DEPOZİTLƏR AZALIB

2021-ci ilin sonunda "Azərbaycan Sənaye Bankı" ASC-də depozitlər 514 milyon 382 min manat ikən, 31 dekabr 2022-ci il tarixində 449 milyon 675 min manat təşkil edib. Depozitlərin azalması Bankın aktivlərinin azalmasına səbəb olub.

31 dekabr 2022-ci il tarixində "Azərbaycan Sənaye Bankı" 104 milyon 654 min manat məcmu kapitala malik olub. Bank 2021-ci ilin sonunda 100 milyon 551 min manat məcmu kapitala malik idi.