“Aqrarkredit” Qapalı Səhmdar Cəmiyyəti Bank Olmayan Kredit Təşkilatı balansında olan 5 şirkətin borcları üzrə tələb hüquqlarını müsabiqə yolu ilə satışa çıxarıb. Tələb hüquqlarının ümumi ilkin satış dəyəri 58 milyon 408 min 597,54 manat təşkil edir.

Marja.az xəbər verir ki, bununla bağlı “Aqrarkredit” QSC BOKT tərəfindən elan verilib.

Elana əsasən, satışa çıxarılan aktivlər “Solid Consulting LTD”, “Kavkasis Betoni 2007”, “United Textiles”, “Nevskiy Torqovıy Dom” və “Riyad Farm” şirkətlərinin borcları üzrə tələb hüquqlarını əhatə edir.

Ən böyük məbləğ “Solid Consulting LTD” şirkətinin borcu üzrədir

“Aqrarkredit”in satışa çıxardığı ən böyük tələb hüququ “Solid Consulting LTD” MMC-nin borcu ilə bağlıdır. Həmin tələb hüququnun ilkin satış dəyəri 23 milyon manat müəyyən edilib.

Digər iri məbləğ “United Textiles” FZE-nin borcu üzrə tələb hüququdur. Bu aktiv 19 milyon 643 min manat ilkin qiymətlə satışa təqdim olunur.

“Kavkasis Betoni 2007” MMC-nin borcu üzrə tələb hüququnun ikinci müsabiqə üzrə satış dəyəri 14 milyon manatdır.

“Nevskiy Torqovıy Dom” MMC üzrə tələb hüququ 1 milyon 439 min 597,54 manat, “Riyad Farm” MMC üzrə isə 325 min manat ilkin qiymətlə satışa çıxarılıb.

Satışa çıxarılan tələb hüquqları

Borclu şirkət İlkin satış dəyəri

“Solid Consulting LTD” MMC - 23 000 000 ₼

“United Textiles” FZE - 19 643 000 ₼

“Kavkasis Betoni 2007” MMC - 14 000 000 ₼

“Nevskiy Torqovıy Dom” MMC -  1 439 597,54 ₼

“Riyad Farm” MMC - 325 000 ₼

Cəmi:     58 407 597,54 ₼

Müsabiqə noyabrın 12-də keçiriləcək

Elana əsasən, tələb hüquqlarının satışına dair müsabiqə üçün ərizələrin qəbulu 12 oktyabr 2026-cı il saat 10:00-dan 6 noyabr 2026-cı il saat 17:00-dək davam edəcək.

Müsabiqənin qalibinin müəyyənləşdirilməsi isə 12 noyabr 2026-cı il saat 11:30-da nəzərdə tutulub.

Müsabiqə Bakı şəhəri, Nəsimi rayonu, S. Vurğun küçəsi 135 ünvanında yerləşən Azərbaycan Respublikasının Maliyyə Nazirliyində keçiriləcək.

İştirakçılar 0,5% beh ödəməlidirlər

Müsabiqədə iştirak etmək istəyən iddiaçılar aktivin elan olunan ilkin satış dəyərinin 0,5%-i həcmində beh ödəməlidirlər.

Qalib iştirakçı təklif etdiyi ən yüksək qiymətə əsasən müəyyən ediləcək.

Müsabiqənin qalibi aktivin dəyərinin 30%-ni bank günü ərzində ödəməli, qalan məbləği isə 10 gün ərzində ödəmək barədə yazılı zəmanət təqdim etməlidir.

Tələb hüquqlarının satılması həmin borcların avtomatik silinməsi demək deyil. Satış nəticəsində kreditorun müvafiq borc üzrə tələb hüququnun yeni sahibə keçməsi nəzərdə tutulur.