Azərbaycan Mərkəzi Bank 30 noyabr 2022-ci il tarixinə bank sektorunun əsas göstəricilərini açıqlayıb.

Marja.az Mərkəzi Bankın məlumatına istinadən xəbər verir ki, fəaliyyətdə olan bankların cəmi aktivləri 45 milyard 490.2 milyon manat, cəmi öhdəlikləri 39 milyard 970.3 milyon manat, balans kapitalı 5 milyard 519.9 milyon manat olmuşdur. 

2022-ci ilin noyabr ayında bankların cəmi aktivləri və öhdəlikləri müvafiq olaraq 1.9% artmışdır. İlin əvvəlindən isə bank sektorunun cəmi aktivləri, cəmi öhdəlikləri və balans kapitalı üzrə artım müvafiq olaraq 18.3%, 19.3% və 11.1% olmuşdur. 

Bankların kredit portfeli noyabr ayında 1% (203.4 milyon manat) artaraq 19 milyard 674.2 milyon manat olmuşdur. Bankların cəmi kredit portfelində biznes kreditlərinin payı 55.8% (10 milyard 975.8 milyon manat) təşkil etmişdir. Ümumilikdə, cari ilin 11 ayında bankların kredit portfeli 18.1% və ya 3 milyard 15.1 milyon manat artmışdır. 

Cəmi kredit portfelində (BOKT-lər və kredit ittifaqları daxil olmaqla) vaxtı keçmiş kreditlərin payı 3.2% təşkil etmişdir. Qeyd olunan göstərici ilin əvvəlinə nəzərən 1 faiz bəndi, ötən ilin müvafiq dövrünə nəzərən isə 1.5 faiz bəndi azalmışdır.

Öhdəliklərin strukturunda depozit portfeli üstünlük təşkil edir (cəmi öhdəliklərin 82.2%-i və ya 32 milyard 860.9 milyon manat). Depozit portfeli noyabr ayında 2.1% (668.8 miylon manat) artmışdır. Depozit portfelinin 65.5%-ni hüquqi şəxslərin depozitləri, 34.5%-ni fiziki şəxslərin depozitləri (əmanət portfeli) təşkil edir. 

Hesabat ayında bankların əmanət portfeli 0.7% (83.3 milyon manat) artaraq 11 milyard 339.9 miylon manat təşkil etmişdir. Əmanət portfelinin 53.4%-i (6 milyard 58 milyon manat) müddətli əmanətlərdən ibarətdir.

Hüquqi şəxslərin tələbli depozitləri 19 milyard 51.1 milyon manat olmaqla (ay ərzində artım 3.1% və ya 565.7 milyon manat), hüquqi şəxslərin cəmi depozit portfelinin (21 milyard 521 milyon manat) 88.5%-ni təşkil etmişdir (ilin əvvəli ilə müqayisədə bu nisbət dəyişməmişdir). 

Fiziki şəxslərin əmanətlərinin dollarlaşması noyabr ayında ilin əvvəlinə nəzərən 2.1 faiz bəndi, ötən ilin müvafiq dövrünə nəzərən isə 3 faiz bəndi azalaraq 38.9% təşkil etmişdir. 

2022-ci ilin 11 ayında banklar 859.4 milyon manat xalis mənfəət, 1 milyard 239.3 milyon manat məbləğində əməliyyat mənfəəti əldə etmişlər. İlin əvvəlindən banklar tərəfindən ümumilikdə 196.6 milyon manat məbləğində mənfəət vergisi ödənilmişdir. 2021-ci ilin müvafiq dövrü ilə müqayisədə bankların xalis və əməliyyat mənfəəti müvafiq olaraq 39.9% və 40.2% artmışdır.

30 noyabr 2022-ci il tarixinə fəaliyyət göstərən 25 bankın filiallarının sayı 484, şöbələrinin sayı 94, ATM-lərin sayı 2975 olmuşdur. 

Hesabat ayında bank sektorunda çalışanların sayı 1.1% və ya 249 nəfər artaraq 22551 nəfər təşkil etmişdir.