Mərkəzi Bank tərəfindən həyata keçirilən əməliyyatlardan biri də açıq bazar əməliyyatlarıdır. 

Açıq bazar əməliyyatları - Mərkəzi Bankın təşəbbüsü ilə həyata keçirilən (əsasən qiymətli kağızların alqı-satqısı formasında) əməliyyatlardır. Mərkəzi Bank tərəfindən qiymətli kağızlar satıldıqda pul təklifi azalır, alındıqda isə pul təklifi artır. Açıq bazar əməliyyatları çərçivəsində qiymətli kağızlar birbaşa, habelə REPO və əks-REPO formasında alınıb satıla bilər.

Mərkəzi Bank tərəfindən likvidliyin sterilizasiyası məqsədilə ehtiyac olduğu təqdirdə öncədən müəyyən edilən həcmlərdə 7 günlük REPO hərracları keçirilə bilər. Hərraclar üzrə faizlər faiz dəhlizinin aşağı həddi (faiz dəhlizinin aşağı həddi daxil edilməməklə) ilə uçot dərəcəsi (uçot dərəcəsi daxil edilməməklə) arasındakı intervalda dəyişə bilər. 

Hazırda faiz dəhlizinin aşağı həddi  6.25%, yuxarı həddi  həddi 9.25%-dir. Uçot faiz dərəcəsi isə 8.25%-dir.

Marja xəbər verir ki, bu gün, 20 dekabr 2022-ci il tarixində Bakı Fond Birjasında Azərbaycan Respublikasının Mərkəzi Bankının tərəf qismində çıxış etdiyi Repo hərracı keçiriləcəkdir. 

Hərracın məbləği 100 milyon manatdır.

Repo hərracının parametrləri barədə məlumat: 

Hərracın tarixi: 20.12.2022

Hərrac vaxtı: 10.30-11.00

Hərracın məbləği: 100.000.000 manat

Repo müddəti 7 gün

Repo predmeti: AZ2001008351

Repo predmetinin sayı: 100.000.000 ədəd

Repo açılış qiyməti: 1 manat

Faiz dəhlizi: 6,26%-8,24%

Hesablama bazası: 365 gün

Bir bank tərəfindən verilən sifarişlərin ümumi həcminə limit:  Açılış məbləğləri üzrə ümumi həcm hərracın məbləğinin maksimum 10%-i həcmində

Hərracın baş tutması üçün tələb olunan bank sayı: ən azı 5 bank.

Qeyd edək ki, REPO hərracında məqsəd pul təklifinin azaldılması ilə inflyasiyanın düşməsinə nail olmaqdır.

Bundan əncə Mərkəzi Bank pul təklifinin azaldılması üçün notlarının yerləşdirilməsinə başlamışdı. Sterilizasiya məqsədilə Mərkəzi Bank öncədən müəyyən edilən həcmlərdə 1,3,6 və 9 aylıq not hərracları keçirə bilər. Not hərracları sabit həcmli olmaqla bazar faizləri əsaslı mexanizmlə keçirilir. Başqa sözlə notların gəlirliyi bazarda tələb-təklif nisbətindən asılı olaraq formalaşır. 15.12.2022 tarixinə Mərkəzi Bankın dövriyyədə olan notlarının həcmi 1 milyard 406 milyon manat təşkil edib. Yəni, Mərkəzi Bank notlarını yerləşdirməklə 1 milyard 406 milyon manatı dövriyyədən çıxarıb.

Sterilizasiya yönümlü əməliyyatlar - artmış pul kütləsinin inflyasiya potensialına malik izafi hissəsinin dövriyyədən çıxarılmasına yönəldilmiş əməliyyatlardır. Bununla belə xarici valyuta bazarında revalvasiya təhlükəsi yaradan artıq valyuta təklifinin alınması əməliyyatlarını xarakterizə etmək üçün də sterilizasiya terminindən istifadə edilir.