"Azərbaycan Respublikası Dövlət Neft Fondunun əsas gəlir mənbələrindən olan Azəri-Çıraq-Günəşli yatağı üzrə hasilatın əvvəlki illərin tendensiyasına uyğun olaraq azalma ilə proqnozlaşdırılması və gələcək dövrlərdə də bu tendensiyanın davam etməsi neftin qiymət dəyişkənliyi şəraitində Fondun ehtiyatlarının azalması ehtimalını artıra bilər".

Marja.az xəbər verir ki, bu barədə Azərbaycan Respublikası Hesablama Palatasının Azərbaycan Respublikası Dövlət Neft Fondunun 2023-cü il büdcəsinin layihəsinə Rəyində bildirilir.

Rəydə qeyd edilib ki, Azərbaycan Respublikasının payına düşən karbohidrogenlərin satışından əldə edilən xalis gəlirlər Fondun gəlirlərinin strukturunda ən böyük paya malikdir. Fond tərəfindən təqdim edilən məlumata əsasən 2023-cü ildə Azəri-Çıraq-Günəşli yatağında xam neft hasilatının həcminin 129,6 mln. barel olması proqnozlaşdırılır ki, bu da hasilatın aşağı düşməsi səbəbindən 2022-ci ilin göstəricisinə (153,1 mln. barel) nisbətən 23,5 mln. barel azdır.

HƏMÇİNİN OXU: Dövlət Neft Fondunun 2023-cü il büdcəsində böyük məbləğdə kəsir nəzərdə tutulur

“Azəri-Çıraq-Günəşli yatağı üzrə son illərin proqnoz göstəricilərinin müqayisəsi nəticəsində 2015-ci ilin hasilat proqnozu ilə 2023-cü ilin hasilat proqnozu arasında təqribən 102,0 mln. barel və ya 44,0% azalma müşahidə edilmişdir. Təqdim edilmiş proqnoz göstəricilərinə əsasən azalma tendensiyasının növbəti illərdə də davam etməsi gözlənilir ki, ortamüddətli proqnozda neftin qiymətinin 2023-cü ilin göstəricisi ilə sabit götürülməsi halında bu mənbə üzrə Fondun gəlirlərinin kəskin azalması ehtimalı yaranır.

Son illərdə neftin qiymətində müşahidə edilən volatillik, yataqlar üzrə hasilatın azalması, habelə OPEC+ çərçivəsində hasilatın azaldılması öhdəliyi ilə bağlı risklərin olması, eyni zamanda xarici maliyyə bazarlarında olan dalğalanmalar və volatillik səbəbindən Fondun aktivlərinin idarə edilməsindən əldə edilən gəlirlərin proqnozlaşdırılan səviyyədə olmama ehtimalı ölkə üçün strateji valyuta ehtiyatı sayılan Fondun aktivlərinin sonda azalması ehtimalını artırır”,- Rəydə deyilir.