"Ziraat Bank Azərbaycan" ASC 2022-ci ilin 9 ayını (yanvar - sentyabr) 6 milyon 181 min manat xalis mənfəət ilə başa vurub.

"Ziraat Bank Azərbaycan"ın xalis mənfəəti 2022-ci ilin 9 ayında 2021-ci ilin 9 ayı ilə müqayisədə 2 milyon 282 min manat və ya 58,5 % artıb. Bank ötən ilin eyni dövründə 3 milyon 899 min manat xalis mənfəət əldə etmişdi. Xalis mənfəətin artması Bankın gəlirlərinin artmasından qaynaqlanır.

GƏLİRLƏRİ ARTIB

Marja.az xəbər verir ki, 2021-ci ilin 9 ayı ilə müqayisədə 2022-ci ilin 9 ayında "Ziraat Bank Azərbaycan"ın faiz gəlirləri 4 milyon 632 min manat və ya 29,6% artaraq 20 milyon 253 min manat, qeyri-faiz gəlirləri isə 4 milyon 260 min manat və ya 84,4 % artaraq 9 milyon 308 min manat təşkil edib. 

2021-ci ilin 9 ayı ilə müqayisədə 2022-ci ilin 9 ayında "Ziraat Bank Azərbaycan"ın faiz xərcləri 481 min manat azalaraq 5 milyon 58 min manat, qeyri-faiz xərcləri isə 2 milyon 270 min manat artaraq 11 milyon  870 min manat təşkil edib. 

Beləliklə, Bankın əməliyyat gəlirlərinin 8 milyon 892 min manat artmasına qarşılıq əməliyyat xərcləri 1 milyon 789 min manat artıb. Yəni, gəlirlərdəki artımın 20%-ni xərclərdəki artım silib. Nəticədə, Bankın əməliyyat mənfəətində 7 milyon 102 min manat artım baş verib.

"Ziraat Bank Azərbaycan" ASC-nin əməliyyat mənfəəti 2022-ci ilin 9 ayında 2021-ci ilin 9 ayı ilə müqayisədə 7 milyon 102 min manat və ya 128% artaraq 12 milyon 633 min manat təşkil edib. Bank əməliyyat mənfəətindən 5 milyon 463 min manat aktivlər üzrə mümkün zərərlərin ödənilməsi üçün xüsusi ehtiyatın yaradılmasına ayırıb və 989 min manat mənfəət vergisi ödəyib. Müqayisə üçün qeyd edək ki, "Ziraat Bank Azərbaycan" ötən ilin eyni dövründə 5 milyon 531 min manat əməliyyat mənfəətindən 1 milyon 290 min manat ehtiyata ayırmış və 341 min manat mənfəət vergisi ödəmişdi.

KREDİT PORTFELİ ARTIB

"Ziraat Bank Azərbaycan"ın kredit portfeli (müştərilərə verilmiş kreditlər) 2022-ci ilin 9 ayında 2021-ci ilin sonu ilə müqayisədə 68 milyon 669 min manat və ya 29,7 % artaraq 30 Sentyabr 2022-ci il tarixində 299 milyon 881 min manat təşkil edib.

BANK BÖYÜYÜB

30 Sentyabr 2022-ci il tarixində "Ziraat Bank Azərbaycan" ASC 435 milyon 794 min manat cəmi aktivlərə malik olub. Bank 2021-ci ilin sonunda 388 milyon 71 min manat cəmi aktivlərə malik idi.

"Ziraat Bank Azərbaycan"ın depozit portfeli 2022-ci ilin 9 ayında ötən ilin sonu ilə müqayisədə 9 milyon 932 min manat və ya 3,3% artaraq 217 milyon 77 min manata çatıb. 

MƏCMU KAPİTALI 100 MİLYON MANATI AŞIB

30 Sentyabr 2022-ci il tarixində "Ziraat Bank Azərbaycan" 100 milyon 479 min manat məcmu kapitala malik olub (31 Dekabr 2021-ci il tarixində 78 milyon 29 min manat idi).