ASB (Azərbaycan Sənaye Bankı) kiçilməkdə davam edib.

Marja.az xəbər verir ki, ASB-nin cəmi aktivləri 2022-ci ilin 3-cü rübündə (iyul-sentyabr dövründə) 23 milyon 820 min manat və ya 3,2% azalaraq 30 Sentyabr 2022-ci il tarixində 714 milyon 112 min manat təşkil edib. 30 İyun 2022-ci il tarixində Bankın cəmi aktivləri 737 milyon 933 min manat təşkil etmişdi. 

O cümlədən, cari ilin 3-cü rübündə ASB-nin kredit portfeli (müştərilərə verilən kreditlər) 7 milyon 105 min manat və ya 2,8% azalaraq 249 milyon 342 min manata, banklar da daxil olmaqla, maliyyə institutlarındakı depozitləri 17 milyon 132 min manat və ya 4,4% azalaraq 367 milyon 765 min manata geriləyib. Qeyd edək ki, ASB-nin digər banklarda yerləşdirdiyi depozitlərdən faiz gəlirləri Bankın əməliyyat gəlirlərinin xeyli hissəsini formalaşdırır. ASB-nin digər abnklardakı depozitlərinin məbləği kredit portfelindən çoxdur.

2021-ci ilin sonu ilə müqayisədə (cari ilin 9 ayında) ASB-nin cəmi aktivləri 98 milyon 449 min manat və ya 12,1% azalıb. Ötən ilin sonunda ASB-nin cəmi aktivləri 812 milyon 561 min manat təşkil etmişdi. O cümlədən, 9 ay ərzində ASB-nin banklar da daxil olmaqla, maliyyə institutlarındakı depozitləri 99 milyon 530 min manat və ya 21,3% azalıb. Müştərilərə verilmiş cəmi kreditlər isə ötən ilin sonu ilə müqayisədə 5 milyon 749 min manat və ya 2,3% çoxdur. 31 Deakbr 2021-ci il tarixində ASB-nin banklar da daxil olmaqla, maliyyə institutlarındakı depozitləri 467 milyon 295 min manat, kredit portfeli 243 milyon 593 min manat təşkil etmişdi.

2021-ci ilin 3-cü rübünün sonunda ASC-nin cəmi aktivləri 866 milyon 646 min manat olmuşdu. Son 12 hesabat ayında Bankın cəmi aktivləri 152 milyon 533 min manat azalıb.

DEPOZİT PORTFELİ KİÇİLİB

ASB-nin depozit portfeli 2022-ci ilin 9 ayı ərzində (ötən ilin sonu ilə müqayisədə) 75 milyon 819 min manat və ya 14,7%, 3-cü rübdə isə (iyul-sentyabr) 17 milyon 904 min manat və ya 3,9% azalaraq 438 milyon 563 min manata geriləyib. ASB-nin depozit portfeli ötən ilin sonunda 514 milyon 382 min manat, 2022-ci ilin 1-ci yarısının sonunda isə 456 milyon 468 min manat təşkil etmişdi.

Balans hesabatına görə, ASB (Azərbaycan Sənaye Bankı) 2022-ci ilin 9 ayını (yanvar-sentyabr dövrünü) 4 milyon 338 min manat xalis mənfəət ilə başa vurub. Bank ötən ilin eyni dövrünü 1 milyon 716 min manat xalis mənfəət ilə bağlamışdı. Beləliklə, ASB-nin xalis mənfəəti 2,5 dəfə artıb. 

ASB-nin faiz gəlirləri 2022-ci ilin 9 ayında ötən ilin eyni dövrü ilə müqayisədə 2 milyon 628 min manat və ya 12,6% azalaraq 18 milyon 292 min manata düşüb, qeyri-faiz gəlirləri isə 3 milyon 288 min manat və ya 78,8% artaraq 7 milyon 460 min manata yüksəlib. Bankın xalis mənfəətinin artması - faiz xərclərinin azalması, qeyri-faiz gəlirlərinin artması və aktivlər üzrə mümkün zərərlərin ödənilməsi üçün xüsusi ehtiyatdan azad olan vəsaitin hesabınadır.

Qeyd edək ki, ASB-nin xalis mənfəəti 2020-ci illə müqayisədə 2021-ci ildə 2,3 dəfə azalaraq 2 milyon 228 min manat təşkil etmişdi.

ASB-nin səhmdarları "Anadolu İnvestment Kompani" MMC (98,4252%),  "Azərbaycan Sənaye Lizinq" MMC (0.5748%) və  Leyla Gozal-dır (1,00%).