2022-ci ilin avqust ayında Azərbaycanda ev təsərrüfatlarının cəmi kredit borcu (ev təsərrüfatlarına cəmi kredit qoyuluşları) 219,5 milyon manat artaraq 10 milyard 328,2 milyon manata çatıb.

Marja.az Mərkəzi Banka istinadən xəbər verir ki, 2022-ci ilin 8 ayında (yanvar-avqust) ev təsərrüfatlarının cəmi kredit borcu 1 milyard 720,9 milyon manat artıb. 2021-ci ilin sonunda ev təsərrüfatlarının cəmi kredit borcu 8 milyard 607,3 milyon manat təşkil etmişdi. 

Ev təsərrüfatlarının cəmi kredit borcu 2022-ci ilin yanvar ayında 160,4 milyon manat, fevralda 180,7 milyon manat, martda 314,4 milyon manat, apreldə 197,9 milyon manat, mayda 222,7 milyon manat, iyunda 238,5 milyon manat, iyulda isə 186,8 milyon manat artıb. 

Son 3 hesabat ayında (iyun-avqustda) ev təsərrüfatlarının cəmi kredit borcu 644,8 milyon manat artıb.

Əgər 2021-ci ilin sonunda ev təsərrüfatlarına kredit qoyuluşlarının cəmi kredit qoyuluşlarında xüsusi çəkisi 50,3% ikən, 2022-ci ilin avqust ayında 54% təşkil edib.

Daşınmaz əmlakın tikintisinə və alınmasına kredit qoyuluşları (ipoteka kreditləri daxil) ev təsərrüfatlarına kredit qoyuluşlarına aid edilir. Avqustda daşınmaz əmlakın tikintisinə və alınmasına kredit qoyuluşları 49.5 milyon manat, cari ilin 8 ayında isə 351,9 milyon manat artaraq 2 milyard 835,3 milyon manata çatıb.

Qeyd edək ki, 2022-ci ilin avqust ayında cəmi kredit qoyuluşları 151,2 milyon manat, cari ilin 8 ayında isə 2 milyard 17 milyon manat artaraq 19 milyard 136,8 milyon manata çatıb. 

2021-ci ilin sonu ilə müqayisədə 2022-ci ilin 8 ayında ticarət və xidmət sektoruna verilmiş kreditlər 139,3 milyon manat artaraq 3 milyard 131,8 milyon manata, inşaat sektoruna kredit qoyuluşları 289,3 milyon manat artaraq 1 milyard 192,5 milyon manata, sənaye sektoruna kredit qoyuluşları 100,1 milyon manat artaraq 1 milyard 71,8 milyon manata, nəqliyyat və rabitə sektoruna kredit qoyuluşları 21,8 milyon manat artaraq 759,1 milyon manata, kənd təsərrüfatı və balıqçılıq sektoruna kredit qoyuluşları 7,1 milyon manat artaraq 598,8 milyon manata çatıb.

Mədənçıxarma sektoruna kredit qoyuluşları 140,1 milyon manat azalaraq 608,9 milyon manata, digər sektorlara kredit qoyuluşları 17,9 milyon manat azalaraq 635,9 milyon manata düşüb.