Azərbaycan Mərkəzi Bankı bugündən etibarən kommersiya banklarına 9.25% ilə 1 günlük borc verəcək.

Marja.az xəbər verir ki, 01.09.2022-ci il tarixindən daimi imkan alətləri olaraq sterilizasiya məqsədilə 1 günlük depozit əməliyyatlarının, likvidliyin verilməsi məqsədilə isə 1 günlük əks-repo əməliyyatlarının aparılmasına başlanılmışdır. Sterilizasiya məqsədilə 1 günlük depozit əməliyyatları üzrə faiz dərəcəsi faiz dəhlizinin aşağı həddinə (4%), likvidliyin verilməsi məqsədilə 1 günlük əks-repo əməliyyatları üzrə faiz dərəcəsi isə faiz dəhlizinin yuxarı həddinə (9.25%) bərabərdir.

REPO qiymətli kağızların satılması və əvvəlcədən razılaşdırılmış müddət bitdikdən sonra onlardan geri alınması əməliyyatıdır. Bu əməliyyat Mərkəzi Bank tərəfindən pul təklifinin həcminin qısamüddətli dövrdə azaldılması məqsədilə həyata keçirilir. ƏksREPO isə qiymətli kağızların alınması və əvvəlcədən razılaşdırılmış müddət bitdikdən sonra geri qaytarılmasını nəzərdə tutan əməliyyatdır. Mərkəzi Bank tərəfindən əks-REPO-nun tətbiq olunmasında məqsəd pul təklifinin qısamüddətli artırılmasıdır.

Banklar öz təşəbbüslərilə hesablaşmaları həyata keçirmək və məcburi ehtiyatları təmin etmək məqsədilə Mərkəzi Bankdan məhdudiyyətsiz məbləğdə əks-REPO əməliyyatı ilə bir günlük likvidlik cəlb edə bilərlər. 1 günlük əks-REPO əməliyyatları üçün təminat qismində Mərkəzi Bankın İdarə Heyətinin 30 noyabr 2017-ci il tarixli qərarı ilə təsdiq edilmiş pul siyasəti əməliyyatları üzrə təminat kimi qəbul edilən qiymətli kağızlar (lombard siyahı) çıxış edə bilər. Bu əməliyyatların keçirilməsi vaxtı hər gün saat 16:45-17:00 intervalıdır. Banklar tərəfindən vəsaitlər növbəti iş günü saat 17:00-dək Mərkəzi Banka geri qaytarılmalıdır. Bir günlük əks-REPO əməliyyatları Mərkəzi Bankın faiz dəhlizinin yuxarı həddində aparılır (Ətraflı buradan oxuya bilərsiniz).

Həmçinin, Mərkəzi Bank tərəfindən açıq bazar əməliyyatlarının təkmilləşdirilməsi çərçivəsində sterilizasiya məqsədilə zəruri halda 1,3,6 və 9 aylıq notlarla yanaşı 7 günlük repo hərraclarının keçirilməsi nəzərdə tutulur. Likvidliyin verilməsi yönümlü açıq bazar əməliyyatları olaraq zəruri hallarda 7 günlük əks-repo hərraclarının keçirilməsi planlaşdırılır. 7 günlük repo əməliyyatları üzrə faizlərin faiz dəhlizinin aşağı həddi ilə uçot dərəcəsi arasındakı intervalda (4%-7,75%) tənzimlənməsi nəzərdə tutulur. 7 günlük əks-repo əməliyyatlarına görə faizlər uçot dərəcəsi ilə faiz dəhlizinin yuxarı həddi arasındakı intervalda (7,75%-9,25%) müəyyənləşəcəkdir. 1,3,6 və 9 aylıq notların gəlirliyi isə bazarda tələb-təklif nisbətindən asılı olaraq formalaşacaqdır. Pul bazarı, xüsusilə də banklararası bazardakı vəziyyətdən asılı olaraq digər açıq bazar əməliyyatları da tətbiq oluna bilər.

Həmçinin oxu

Mərkəzi Bankı pul siyasəti alətlərinin yeni konfiqurasiyada tətbiqinə başlayır - AÇIQLAMA