Cənubi Koreyanın “Hyundai” markasının Azərbaycanda rəsmi distribütoru “Auto Azərbaycan” şirkəti Tam Yeni IONIQ 5 modelinin satışına başlayır.

Marja.az xəbər verir ki, 26 İyul 2022-ci il tarixində “Auto Azərbaycan” şirkəti Bakıda Babək prospektində yeni istifadəyə verilmiş “Otoplaza Mall”da tam elektrikli nəqliyyat vasitəsi olan IONIQ 5-in təqdimatını keçirib.

Təqdimatda “Auto Azərbaycan” şirkətinin direktoru Emil İsmayılov bildirib ki, bütün dünyada, o cümlədən Azərbaycanda da elektromobillərə təlabat artmaqdıdır. Elektrik enerjisi ilə çalşan avtomobillər həm həm qənaət, həm də ekologiyanın qorunması deməkdir.  

“Auto Azərbaycan” şirkətinin Marketinq direktoru Anar İsmayılov bildirib ki, IONIQ 5 Hyundai brendinin növbəti unukal avtomobilidir. Bu avtomobilin unikallığını eksteryerindən interyerinədək görmək mümkündür. IONIQ 5-in ən böyük unikallığı tam dolu batareya ilə daha uzun məsafə qət edə bilməsidir.

“Hyundai Azərbaycan”ın satış direktoru Vüqar Əhmədov Marja-ya bildirdi ki,dünyada böyük marağa səbəb olan tamamilə elektrikli IONIQ 5 avtomobili bir çox innovativ xüsusiyyətləri özündə cəmləşdirir. Bu ekoloji cəhətdən təmiz avtomobil dünyada “İlin Avtomobili” adına sahibdir. Bu səbəbdən IONIQ 5 Koreyanın avtomobil istehsalçısının ən böyük qürurlarından biridir.

Hyundai Ioniq 5 sürətli enerji doldurma (yığma) və daha uzun məsafə vəd edir. IONIQ 5 cəmi 18 dəqiqə ərzində 80 faizə qədər enerji yığa bilir. 5 dəqiqəlik enerji yığmaqla belə 100 km-dən çox məsafə qət edə bilir. IONIQ 5 tam enerji yığmaqla 470 km-dən çox mənzil vəd edir.

IONIQ 5 həm müasir, həm də retro ilhamları özündə birləşdirən dizayna malikdir. 5 yerlik hetçbek olsa belə, bu model daha çox SUV modelinə bənzəyir. Qeyri-adi dizayna malik olan Ioniq 5-də minimalist LED fənərlər var. Təkər bazası üç metr olan elektromobil 20 düymlük yüngül lehimli disklərə malikdir.Bu elektrikli avtomobili gələcəyin elektrik avtomobillərinin istehsalı üçün Hyundai platforması olan E-GMP-də dizayn edilib. Bu sayədə kiçik gövdəsinə baxmayaraq istifadəçilərinə geniş bir daxili məkan təqdim edir.

IONIQ 5-in 12 düymlük ekranı vasitəsilə bir çox funksiyaları idarə etmək mümkündür. Üstəlik, məlumat-əyləncə sistemi bütün telefonlarla ahəngdar işləyir.

IONIQ 5 elektromobili 185 km/saat maksimal sürətə çata, 0-dan 100 km/saat sürəti 5,2 saniyəyə yığa bilir.

IONIQ 5 elektromobili 58 kVt və ya 72,6 kVt-saat olmaqla iki batareya paketi variantında istehsal olunur. Azərbaycanda 72,6 kVt-saat batareya paketi təklif olunur. Bu paketin ön təkərdən və dörd təkərdən çəkiş olmaqla iki versiyası mövcuddur.

IONIQ 5 Azərbaycanda 93 min 900 manat və 99 min 900 manat qiymətlərə təklif olunur. 

Hyundai dünyanın ən böyük elektrikli avtomobil istehsalçısı olmağı hədəfləyir.