“Yapı Kredi Bank Azərbaycan” QSC 2022-ci ilin birinci yarısını (yanvar-iyun dövrünü) 1 milyon 361 min manat xalis mənfəət ilə başa vurub. Bank ötən ilin eyni dövrünü 232 min manat, tam 2021-ci ili isə 931 min manat xalis zərər ilə bağlamışdı. Bankın 2022-ci ilin birinci yarısındakı xalis mənfəəti gəlirlərinin artmasından qaynaqlanır.

Marja.az xəbər verir ki, “Yapı Kredi Bank Azərbaycan”ın faiz gəlirləri 2021-ci ilin ilk 6 ayı ilə müqayisədə 2022-ci ilin ilk 6 ayında 232 min manat və ya 2 % artaraq 12 milyon 121 min manat, qeyri-faiz gəlirləri isə 1 milyon 921 min manat və ya 29,7% artaraq 8 milyon 382 min manat təşkil edib.  

ƏMƏLİYYAT MƏNFƏƏTİ ARTIB

2022-ci ilin yanvar-iyun dövründə “Yapı Kredi Bank Azərbaycan” QSC-nin cəmi əməliyyat gəlirləri (faiz və qeyri-faiz gəlirləri) 20 milyon 503 min manat, cəmi əməliyyat xərcləri (faiz və qeyri-faiz xərcləri) 16 milyon 16 min manat təşkil edib. Gəlirlər xərcləri üstələdiyindən Bankın əməliyyat mənfəəti 4 milyon 487 min manat təşkil edib. Əməliyyat mənfəətindən 2 milyon 477 min manat mümkün zərərlər üçün yaradılan ehtiyatlara ayrılıb, 649 min manat mənfəət vergisi ödənilib.

2021-ci ilin yanvar-iyun dövründə “Yapı Kredi Bank Azərbaycan” QSC-nin cəmi əməliyyat gəlirləri 18 milyon 350 min manat, əməliyyat xərcləri 14 milyon 744 min manat, əməliyyat mənfəəti 3 milyon 606 min manat, mümkün zərərlər üçün yaradılan ehtiyatlara ayırma 3 milyon 372 min manat, mənfəət vergisi 465 min manat təşkil etmişdi.

2022-ci ilin yanvar-iyun dövründə “Yapı Kredi Bank Azərbaycan”ın cəmi əməliyyat gəlirləri 2 milyon 153 min manat, cəmi əməliyyat xərcləri 1 milyon 271 min manat artıb. Gəlirlər xərclərdən daha çox artdığından əməliyyat mənfəəti 882 min manat daha çox olub.

BANKIN BİZNES KREDİTLƏRİ PORTFELİ DAHA ÇOX ARTIB

2021-ci ilin sonu ilə müqayisədə “Yapı Kredi Bank Azərbaycan”ın kredit portfeli (müştərilərə verilmiş kreditlər) 45 milyon 990 min manat və ya 26,3% artaraq 30 iyun 2022-ci il tarixində 220 milyon 904 min manat təşkil edib. Cari ilin ilk 6 ayında Bankın biznes kreditləri portfeli 42 milyon 622 min manat və ya 36,3% artaraq 159 milyon 878 min manata, ipoteka kreditləri portfeli 2 milyon 717 min manat və ya 15,5% artaraq 20 milyon 224 min manata, istehlak kreditləri portfeli isə 651 min manat və ya 1,6% artaraq  40 milyon 802 min manata yüksəlib.

MƏCMU KAPİTALI ARTIB

30 İyun 2022-ci il tarixində “Yapı Kredi Bank Azərbaycan” 76 milyon 305 min manat məcmu kapitala malik olub. Bank 2021-ci ilin sonunda 74 milyon 316 min manat məcmu kapitala malik idi.

“Yapı Kredi Bank Azərbaycan” QSC-nin səhmdarları Türkiyədə təsis edilmiş “Yapı və Kredi Bankası A.Ş” (99,8%), “YK Yatırım Menkul Degerler A.Ş” (0,01%) və “YK Lease AŞ”dir (0.01%).