“Ziraat Bank Azərbaycan” ASC 2022-ci ilin birinci yarısını (yanvar-iyun dövrünü) 3 milyon 811 min manat xalis mənfəət ilə başa vurub. Bank ötən ilin eyni dövrünü 1 milyon 918 min manat xalis mənfəət ilə bağlamışdı. Beləliklə, “Ziraat Bank Azərbaycan”ın xalis mənfəəti 2021-ci ilin birinci yarısı ilə müqayisədə 2022-ci ilin birinci yarısında 2 dəfə artıb.

GƏLİRLƏRİ ARTIB

Marja xəbər verir ki, "Ziraat Bank Azərbaycan"ın faiz gəlirləri 2021-ci ilin birinci yarısı ilə müqayisədə 2022-ci ilin birinci yarısında 3 milyon 97 min manat və ya 26,6% artaraq 14 milyon 748 min manat təşkil edib. Bankın qeyri-faiz gəlirləri isə 2 milyon 839 min manat və ya 89,2% artaraq 6 milyon 23 min manat təşkil edib. 

BANK BÖYÜYÜB

2021-ci ilin sonu ilə müqayisədə "Ziraat Bank Azərbaycan" ASC-nin cəmi aktivləri 52 milyon 779 min manat və ya 13,6% artaraq 30 iyun 2022-ci il tarixində 440 milyon 849 min manata çatıb. Bank tərəfindən müştərilərə verilmiş kreditlər isə 57 milyon 712 min manat və ya 25% artaraq 288 milyon 924 min manata yüksəlib. 

2021-ci ilin sonu ilə müqayisədə "Ziraat Bank Azərbaycan" ASC-nin depozit portfeli 17 milyon 883 min manat və ya 8,5% artaraq 30 iyun 2022-ci il tarixində 228 milyon 28 min manata çatıb.

MƏCMU KAPİTALI 100 MİLYON MANATA YAXINLAŞIB

30 İyun 2022-ci il tarixində "Ziraat Bank Azərbaycan" ASC 98 milyon 381 min manat məcmu kapitala malik olub. Bank 2021-ci ilin sonunda 78 milyon 29 min manat məcmu kapitala malik idi. 

“Ziraat Bank Azərbaycan” ASC Türkiyə Respublikasına məxsus, 158 illik tarixə malik olan “Ziraat Maliyyə Qrupu”-nun tərkib hissəsidir və Azərbaycan Respublikasının Mərkəzi Bankı tərəfindən verilmiş 30.12.2014-cü il tarixli 255 nömrəli lisenziya əsasında fəaliyyət göstərir. Bank korporativ və pərakəndə bankçılıq sahəsində məhsul və xidmətlərini Bakı, Gəncə və Sumqayıt şəhərlərində yerləşən ümumi 7 filialı ilə yanaşı, rəqəmsal satış və xidmət platformaları üzərindən də müştərilərə təqdim edir.