“Rabitəbank” ASC 2022-ci ilin 1-ci yarısını (yanvar-iyun dövrünü) 5 milyon 161 min manat xalis mənfəət ilə başa vurub. Bank ötən ilin eyni dövrünü 4 milyon 685 min manat xalis mənfəət ilə bağlamışdı. Beləliklə, “Rabitəbank”ın xalis mənfəəti 2021-ci ilin 1-ci yarısı ilə müqayisədə 2022-ci ilin 1-ci yarısında 475 min manat və ya 10,1% artıb. Xalis mənfəətin artması mümkün zərərlər üçün yaradılan məqsədli ehtiyatlara ayırmanın azalmasından qaynaqlanır.

GƏLİRLƏRİ ARTIB

“Rabitəbank” ASC-ın faiz gəlirləri 2021-ci ilin ilk 6 ayında 25 milyon 792 min manat ikən, 2022-ci ilin ilk 6 ayında 31 milyon 580 min manat təşkil edib (5 milyon 788 min manat və ya 22,4% artıb). Bankın qeyri-faiz gəlirləri isə 13 milyon 111 min manatdan 22 milyon 346 min manata yüksəlib (9 milyon 235 min manat və ya 70,4% artıb).

2022-ci ilin yanvar-iyun dövründə “Rabitəbank” ASC-ın cəmi əməliyyat gəlirləri 53 milyon 926 min manat, əməliyyat xərcləri 43 milyon 628 min manat, gəlirlər xərcləri üstələdiyindən əməliyyat mənfəəti 10 milyon 298 min manat təşkil edib. Bank mümkün zərərlər üçün yaradılan məqsədli ehtiyatlar 5 milyon 137 min manat ayırıb və ilk yarımili 5 milyon 161 min manat xalis mənfəət ilə bağlayıb.

Müqayisə üçün qeyd edək ki, 2021-ci ilin yanvar-iyun dövründə “Rabitəbank” ASC-ın cəmi əməliyyat gəlirləri 38 milyon 903 min manat, cəmi əməliyyat xərcləri 26 milyon 923 min manat, əməliyyat mənfəəti 11 milyon 980 min manat, mümkün zərərlər üçün yaradılan məqsədli ehtiyatlara ayırma 7 milyon 294 min manat, xalis mənfəəti 4 milyon 685 min manat təşkil etmişdi. 

MÜŞTƏRİLƏRƏ VERİLMİŞ KREDİTLƏR ARTIB

30 İyun 2022-ci il tarixində "Rabitəbank" ASC 965 milyon 239 min manat cəmi aktivlərə, o cümlədən 556 milyon 448 min manat kredit portfelinə (müştərilərə verilmiş kreditlər) malik olub. Bank ötən ilin sonunda 1 milyard 17 milyon 872 min manat cəmi aktivlərə, o cümlədən 473 milyon 963 min manat kredit portfelinə malik idi. Ötən ilin sonu ilə müqayisədə "Rabitəbank"ın kredit portfeli 82 milyon 485 min manat və ya 17,4% artıb.

30 İyun 2022-ci il tarixində "Rabitəbank" ASC-nin məcmu kapitalı 102 milyon 607 min manat təşkil edib.