Yaxın vaxtlarda istifadəyə veriləcək Bakı KOB evində startaplar üçün “Equipment sharing” modeli əsasında mərkəz yaradılacaq.

Bunu İqtisadiyyat Nazirliyi yanında Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov “Rəqəmsal sahibkarlıq və perspektiv imkanlar” mövzusuna keçirilən tədbirdə bildirib.

Onun sözlərinə görə, burada müxtəlif texnoloji avadanlıqlar, serverlər və şəbəkə sistemləri startapların ortaq istifadəsinə veriləcək: “Yaradılması nəzərdə tutulan model müəssisə startaplara və KOB-lara ən səmərəli istehsal proseslərini sınaqdan keçirmək imkanı verəcək”.

O. Məmmədov qlobal pandemiyanın dünya iqtisadiyyatına mənfi təsiri ilə yanaşı, onlayn fəaliyyəti və rəqəmsal sahibkarlığı stimullaşdırdığını, yeni bilik və bacarıqların inkişafına, rəqəmsallaşmanın sürətlənməsinə, yeni biznes proseslərin yaranması və inkişafına təkan verdiyini vurğulayıb.

O qeyd edib ki, aparılmış hesablamalar bəzi sahələr üzrə rəqəmsallaşmanın 10 dəfəyə qədər sürətləndiyini göstərir: “Son illər Azərbaycanda inkişaf etmiş ölkələrin təcrübəsinə uyğun olaraq, rəqəmsal sahibkarlığı inkişaf etdirmək üçün xüsusi islahatlar aparılır, stimullaşdırıcı mexanizmlər tətbiq olunur”.

KOBİA-nın sahibkarlığın rəqəmsallaşdırılması, biznes fəaliyyətində innovasiyaları təşviq edən dəstək və xidmətləri barədə məlumat verən Agentlik sədri bu sahədə gələcək planları da diqqətə çatdırıb: “Hazırda sahibkarlara göstərilən xidmətlərin yaxşılaşdırılması və elektronlaşdırılması məqsədilə “e-KOB evi” portalı yaradılmaqdadır”.

Qeyd edək ki, bu gün Rəqəmsal İnkişaf və Nəqliyyat Nazirliyinin və KOBİA-nın dəstəyi, KOBİA yanında İctimai Şuranın təşkilatçılığı ilə növbəti ictimai müzakirə təşkil olunub. Dövlət qurumlarının və biznes assosiasiyaların nümayəndələrinin, 70-ə yaxın iş adamının iştirakı ilə keçirilmiş budəfəki ictimai müzakirə “Rəqəmsal sahibkarlıq və perspektiv imkanlar” mövzusuna həsr olunub.

Dövlət-sahibkar əməkdaşlığı çərçivəsində təşkil olunmuş ictimai müzakirədə ölkəmizdə həyata keçirilən rəqəmsallaşdırma siyasəti, əlverişli biznes mühitinin formalaşdırılmasında rəqəmsallaşdırmanın rolu, rəqəmsal sahibkarlığın inkişaf etdirilməsi, bu sahədə KOB subyektlərinə dəstək məsələləri müzakirə olunub.