“AccessBank” QSC 2022-ci ilin 1-ci rübünü 803 min manat xalis mənfəət ilə başa vurub. Bank 2021-ci ilin ilk rübünü 135 min manat xalis mənfəət ilə bağlamışdı. Beləliklə, “AccessBAnk”ın xalis mənfəəti 2021-ci ilin 1-ci rübü ilə müqayisədə 2022-ci ilin 1-ci rübündə 6 dəfəyə yaxın artıb. Xalis mənfəətin artması gəlirlərin artmasından qaynaqlanır.

GƏLİRLƏRİ ARTIB

Marja.az xəbər verir ki, “AccessBank”ın faiz gəlirləri 2021-ci ilin ilk rübündə 22 milyon 613 min manat ikən, 2022-ci ilin ilk rübündə 30 milyon 679 min manat təşkil edib (8 milyon 66 min manat və ya 35,7% artıb). Bankın qeyri-faiz gəlirlər isə 1 milyon 281 min manatdan 1 milyon 808 min manata yüksəlib (527 min manat və ya 41% artıb).

2022-ci ilin yanvar-mart dövründə “AccessBank”ın cəmi əməliyyat gəlirləri (faiz və qeyri-faiz gəlirləri) 32 milyon 487 min manat, cəmi əməliyyat xərcləri (faiz və qeyri-faiz xərcləri) 30 milyon 109 min manat, gəlirlər xərcləri üstələdiyindən əməliyyat mənfəəti 2 milyon 378 min manat təşkil edib. Bank əməliyyat mənfəətindən mümkün zərərlər üçün yaradılan məqsədli ehtiyatlara 1 miylon 575 min manat ayırıb. Nəticədə, “AccessBank” 2022-ci ilin 1-ci rübünü 803 min manat xalis mənfəət ilə bağlayıb.

Müqayisə üçün qeyd edək ki, 2021-ci ilin yanvar-mart dövründə “AccessBank”ın cəmi əməliyyat gəlirləri 23 milyon 894 min manat, cəmi əməliyyat xərcləri 24 milyon 651 min manat, xərclər gəlirlərdən çox olduğu üçün əməliyyat zərəri 757 min manat təşkil etmişdi. Ehtiyatlardan azad olmuş 892 min manat hesabına həm əməliyyat zərəri bağlanmış, həm də Bankın 135 min manat xalis mənfəəti yaranmışdı.

BANKIN BÖYÜKLÜYÜ 1 MİLYARD MANATA YAXINLAŞIB

“AccessBank”ın cəmi akivləri 2021-ci ilin sonu ilə müqayisədə 51 milyon 466 min manat və ya 5,5% artaraq 31 mart 2022-ci il tarixində 983 milyon 616 min manata, müştərilərə verilmiş kreditlər isə 34 milyon 449 min manat və ya 5,4% artaraq 666 milyon 925 min manata çatıb. Bankın istehlak kreditləri portfeli 11  milyon 730 min manat artaraq 97 miylon 951 min manata, biznes kreditləri 23 milyon 221 min manat artaraq 562 milyon 590 min manata çatıb, ipoteka kreditləri portfeli isə 502 min manat azlaraq 6 milyon 384 manata düşüb.

BANKDA ƏHALİNİN ƏMANƏTLƏRİ ARTIB

“AccessBank”ın depozit portfeli ilk rübdə 54 milyon 783 min manat və ya 7,9% artaraq 744 milyon 611 min manata, o cümlədən fiziki şəxslərin əmanətləri 49 milyon 935 min manata artaarq 607 milyon 908 min manata çatıb.

31 Mart 2022-ci il tarixində “AccessBank”ın  məcmu kapitalı 81 milyon 520 min manat təşkil edib.