Aktivlərinin həcminə görə Azərbaycanda 4-cü böyük bank olan Xalq Bank 2022-ci ilin ilk rübünü (yanvar-mart dövrünü) 7 milyon 10 min manat xalis mənfəət ilə başa vurub. Bank 2021-ci ilin 1-ci rübünü 4 milyon 712 min manat xalis mənfəət ilə bağlamışdı. Beləliklə, 2021-ci ilin 1-ci rübü ilə müqayisədə 2022-ci ilin 1-ci rübündə Xalq Bankın xalis mənfəəti 2 milyon 298 min manat və ya 48,8% çox olub. Xalis mənfəətin artması əsasən qeyri-faiz gəlirlərinin artmasından qaynaqlanır.

Marja.az xəbər verir ki, 2021-ci ilin 1-ci rübü ilə müqayisədə 2022-ci ilin 1-ci rübündə Xalq Bankın faiz gəlirləri 24 milyon 190 min manat ikən, 2022-ci ilin 1-ci rübündə 24 milyon 457 min manat təşkil edib. Bankı qeyri-faiz gəlirləri isə 1 milyon 399 min manatdan 5 milyon 212 min manata yüksəlib (3,7 dəfə artıb). 

2022-ci ilin ilk rübündə Xalq Bankın cəmi əməliyyat gəlirləri (faiz və qeyri-faiz gəlirləri) 29 milyon 669 min manat, cəmi əməliyyat xərcləri (faiz və qeyri-faiz xərcləri) 19 milyon 290 min manat təşkil edib. Gəlirlər xərcləri üstələdiyindən Bankın 10 milyon 379 min manat əməliyyat mənfəəti yaranıb. Bank əməliyyat mənfəətindən 2 milyon 15 min manat aktivlər üzrə mümkün zərərlərin ödənilməsi üçün xüsusi ehtiyatın yaradılmasına ayırıb, 1 milyon 353 min manat mənfəət vergisi ödəyib. 

Xatırladaq ki, 2021-ci ilin ilk rübündə Xalq Bankın cəmi əməliyyat gəlirlər 25 milyon 589 min manat, cəmi əməliyyat xərcləri 17 milyon 418 min manat, əməliyyat mənfəəti 8 milyon 171 min manat, aktivlər üzrə mümkün zərərlərin ödənilməsi üçün xüsusi ehtiyatın yaradılmasına ayrılan vəsait 2 milyon 1 min manat, mənfəət vergisi 1 milyon 471 min manat təşkil etmişdi.

BANK BÖYÜYÜB, KREDİT PORTFELİ ARTIB

31 Mart 2022-ci il tarixində Xalq Bank 2 milyard 387 milyon 519 min manat cəmi aktivlərə, o cümlədən 1 milyard 421 milyon 882 min manat kredit portfelinə (müştərilərə verilən kreditlər) malik olub. Bank ötən ilin sonunda 2 milyard 339 milyon 392 min manat cəmi aktivlərə, o cümlədən 1 milyard 406 milyon 980 min manat kredit portfelinə malik idi.

Bankın depozit portfeli isə ötən ilin sonundakı 1 milyard 543 milyon 28  min manatdan 31 Mart 2022-ci il tarixində 1 milyard 566 milyon 281 min manata çatıb. 

31 Mart 2022-ci il tarixində Xalq Bank 441 milyon 176 min manat məcmu kapitala malik olub.