Azərbaycanlıların Türkiyədə mənzil almağa marağı “PAŞA Bank Türkiyə”ni hərəkətə keçirib.

Marja xəbər verir ki, 2015-ci ildən Türkiyədə fəaliyyət göstərən bank azərbaycanlıların Türkiyədə ev almasını asanlaşdırmaq üçün aprel ayından etibarən Azərbaycan vətəndaşlarına mənzil krediti (ipoteka krediti) verməyə başlayacaq. Kreditdən türk lirəsi ilə yanaşı, Azərbaycan manatı, ABŞ dolları və ya avro ilə də istifadə etmək olarcaq. Bank gələcəkdə Türkiyə vətəndaşlarına da kredit verməyi planlaşdırır.

“PAŞA Bank Türkiyə”nin baş direktor müavini Hale Yıldırım, “Türkiyə və Azərbaycan iki qardaş ölkədir, biz iki dövlət, bir millətik. Azərbaycanlıların Türkiyəyə marağı yüksəkdir, bura onların da vətənidir. Biz "PAŞA Bank Türkiyə" olaraq 2021-ci ildə Premium Banking bölməmizi yaradaraq fərdi müştərilərə investisiya məhsulları təklif etməyə başlamışıq” deyib.

Türkiyəyə marağı ilk öncə PAŞA Holdinq şirkətlər qrupunun işçiləri arasında sorğu keçirərək ölçdüklərini və ev almaq istədikləri yerləri müəyyənləşdirdiklərini qeyd edən Yıldırım: “Bu ay keçiriləcək təqdimatdan sonra, Azərbaycan vətəndaşlarına fərdi ipoteka kreditləri verməyə başlayacağıq. Müştərilərimiz kreditdən türk lirəsi ilə yanaşı, Azərbaycan manatı, ABŞ dolları və ya avro ilə də istifadə etmək imkanı əldə edəcəklər. İpoteka kreditimizi əvvəlcə PAŞA Qrupun əməkdaşlarına, sonra isə bütün Azərbaycan vətəndaşlarına təqdim edəcəyik”. 

Yıldırım qarşıdakı dövrdə Türkiyə vətəndaşlarına da ipoteka krediti verməyi planlaşdırdıqlarını açıqlayıb. Bu il pilot layihə tətbiq edəcəklərini qeyd edən Yıldırım, “Bu məhsulda ipoteka məbləği alınacaq daşınmaz əmlakın 70%-i ilə məhdudlaşacaq. Müddət; məbləğdən və valyuta növündən asılı olaraq orta hesabla 5 il olacaq”, - bildirib.

Türkiyədəki ev qiymətlərinin azərbaycanlılar üçün daha cəlbedici olduğunu vurğulayan Hale Yıldırım deyib: “Türkiyəyə tez-tez səfərlər və Türkiyəyə təhsil almağa gələn universitet tələbələrinə görə mənzilə tələbat artır. İstanbul başda olmaqla Ankara, İzmir, Antalya və Muğlaya maraq yüksəkdir”.

Qeyd edək ki,  2022-ci ilin yanvar-fevral aylarında azərbaycanlılar Türkiyədə 182 mənzil alıblar. Azərbaycanlılar Türkiyədə 2020-ci ildə 1279, 2021-ci ildə isə 1517 mənzilə mənzilə sahib olublar.