Rusiyanın Ukraynanın şərqindəki rusiyayönlü separatçıların qondarma administrasiyalarını rəsmən tanımasından sonra ABŞ Maliyyə Nazirliyi Rusiyanın 2 bankına və 42 törəmə müəssisəsinə və 5 nəfərə sanksiya tətbiq etmək qərarına gəlib.

"İqtisadi sanksiyalar Rusiyanın Donetsk və Luqansk vilayətlərindəki hərəkətlərinə cavab olaraq tətbiq ediləcək", - ABŞ Xəzinə Nazirliyinin bəyanatında deyilir.

Marja xəbər verir ki, açıqlamada Rusiyanın 2 bankı Vneşekonombank (VEB) və Promsvyazbank (PSB) və onun 42 törəmə bankının sanksiya siyahısına daxil edildiyi qeyd edilib.

Bəyanatda Rusiyanın 2 böyük maliyyə qurumuna qarşı sanksiyaların ölkənin qonşularına qarşı “təcavüz”ünü maliyyələşdirmək imkanlarına yönəldiyi bildirilib və bu qurumların ümumi aktivlərinin 80 milyard dollardan çox olduğu və Rusiyanın müdafiə sektorunu və iqtisadi inkişafını maliyyələşdirdikləri qeyd edilib.

Açıqlamada, sözügedən sanksiya qərarı ilə bu qurumların ABŞ-dakı aktivlərinin dondurulacağı, ABŞ fərdləri və müəssisələri ilə hər hansı əməliyyatlar aparmalarının qadağan ediləcəyi, təşkilatların qlobal maliyyə sistemindən uzaqlaşdırılacağı və ABŞ dollarına çıxışı bloklanacaq.

Rusiyanın maliyyəyə çıxışına qadağa

Açıqlamada Rusiya prezidenti Vladimir Putinin yaxın çevrəsindən 5 nəfərin sanksiya siyahısına daxil edildiyi, onların arasında Federal Təhlükəsizlik Xidmətinin direktoru, Təhlükəsizlik Şurasının daimi üzvü Denis Aleksandroviç Bortnikov ilə oğlu Aleksandr Vasilieviç Bortnikov, PSB-nin icraçı direktoru Petr Mixayloviç Fradkov və Prezident xüsusi katibinin müavini Sergey Vladilenoviç Kiriyenko və oğlu Sergey Vladilenoviç Kiriyenkonun olduğu bildirilib.

Açıqlamada Rusiyanın dövlət borcu ilə bağlı əməliyyatlara qoyulan məhdudiyyətlərin də artırıldığı vurğulanıb və bu məhdudiyyətlərin Rusiya hökumətinin maliyyələşdirməsini əhəmiyyətli dərəcədə maneə törədəcəyi bildirilib.

“Tərəfdaşlarımız və müttəfiqlərimizlə koordinasiyalı şəkildə qəbul edilən qərarlar ilə Kremlin maliyyə şəbəkəsini, onun Ukraynada və dünyada sabitliyi pozan fəaliyyətini maliyyələşdirmək imkanlarını məhdudlaşdırmaq prosesinə başlayırıq”, - ABŞ Maliyyə naziri Janet Yellen bildirib. 

Rusiyanın hərəkətlərini izləməyə davam etdiklərini bildirən Yellen, Rusiyanın Ukraynaya daha da təcavüzü halında ABŞ-ın tezliklə Rusiya iqtisadiyyatına ciddi və qalıcı təsir göstərəcək hərtərəfli iqtisadi sanksiyalar tətbiq ediləcəyini qeyd edib.