“2022-ci ildə bizi narahat edən ən böyük amil dünyadakı bahalaşmadır. Artıq Azərbaycanda inflyasiya göstəricisi əmanət faizlərindən yüksəkdir və belə bir vəziyyət əmanətlərin artmasını zəiflədə, hətta azalmasına səbəb ola bilər”.

Marja xəbər verir ki, bunu jurnalistlər ilə görüşündə “Yelo Bank” ASC-nin İdarə Heyətinin sədri Anar Həsənov bildirib.

Təcrübəli bankir qeyd edib ki, Dünya ölkələrində, o cümlədən Azərbaycanda da inflyasiya yüksəlməkdədir. Yanvarda 12,5% təşkil etmiş illik inflyasiya bankların əmanət faizlərini xeyli üstələyib: “Əmanətçi banka əmanət yerləşdirərək bankdan və şərtlərdən asılı olaraq illik 7-11% civarında gəlir əldə edir, digər tərəfdən qiymətlər illik 13%-ə yaxın artıb. Bu o deməkdir ki, pul daha çox ucuzlaşdığından əmanətçilər real olaraq qazanmayıblar. Belə bir vəziyyət bankların əmanət portfellərinin artım tempinin zəifləməsi, hətta azalması ilə nəticələnə bilər. Digər tərəfdən də, əhalinin və investorların öz vəsaitlərini bank əmanətlərindən başqa sərmayə edəcəkləri alətlər yox dərəcəsindədir. Əmanət faizlərindən yüksək inflyasiyaya baxmayaraq bir çox müştərilər pulunu evdə saxlamaqdansa, bankda saxlamağa üstünlük verəcəklər. Çünki əmanət faizləri inflyasiya ilə itirilən qazancın bir hissəsini kompensasiya edir. Əmanətinə sırf gəlir kimi baxan əmanətçilərin qərarlarında isə dəyişiklik ola bilər. Növbəti aylarda qarşımızda bu kimi risklər var”.

Anar Həsənov vurğulayıb ki, bank sektorunun əmanətlərdən asılılığı çox güclüdür: “Biz öz fəaliyyətimizi əsasən depozitlər üzərində qurmuşuq”.

Anar Həsənov  əlavə edib ki, “Yelo Bank” keçən ilin yanvar ayından bəri 2022-ci ilin yanvar ayı da daxil olmaqla hər ayı gəlir ilə başa vurub.  “Yelo Bank” 2022-ci ildə daha çox ehtiyat yaratmağa və regionlarda filial şəbəkəsinin genişləndirilməsinə fokuslanacaqdır.

"Yelo Bank"ın sədri qeyd edib ki, 2021-ci il gözlədiklərindən də yaxşı olub: "3 milyon manat xalis mənfəət gözləyərkən ili 12 milyon manata yaxın xalis mənfəət ilə başa vurduq. Pandemiya ilə əlaqədar təxirə salınmınş tələbin bir hissəsi ötən il reallaşdırıldığı və Qarabağın bərpasına investisiyalar artdığı üçün iqtisadiyyat canlandı, bank xidmətlərinə və kreditlərə tələb artdı".