“Sığortaolunanların sanatoriya-kurort müalicəsi və sağlamlaşdırma tədbirlərinin həyata keçirilməsi üzrə xərclərdə proqnozlaşdırılmış artımı Dövlət Sosial Müdafiə Fondunun (DSMF) cəmi xərclərinin artım tempindən daha sürətlə nəzərdə tutulmuşdur”. 

Marja xəbər verir ki, bu, Dövlət Sosial Müdafiə Fondunun 2022-ci il büdcəsi layihəsinə Azərbaycan Respublikası Hesablama Palatasının rəyində bildirilir.

Rəydə qeyd edilibi, qanun layihəsinə əsasən növbəti ildə sığortaolunanların sanatoriya-kurort müalicəsi və sağlamlaşdırma tədbirlərinin həyata keçirilməsi üzrə Azərbaycan Həmkarlar İttifaqları Konfederasiyası (AHİK) vasitəsi ilə maliyyələşdirilən xərclərin maliyyələşdirilməsi üçün 21,5 milyon manat və ya cəmi xərclərin 0,4%-i qədər vəsait nəzərdə tutulmuşdur ki, bu da cari ilin müvafiq gözlənilən icra göstəricisindən 1 milyon manat (4,9%) çoxdur. Lakin AHİK tərəfindən Hesablama Palatasına təqdim edilmiş məlumatlarda növbəti il üzrə Fondun vəsaiti hesabına maliyyələşdirilməsi proqnozlaşdırılan vəsait 26,6 milyon manat məbləğində nəzərdə tutulmuşdur ki, bu da Fondun müvafiq göstəricisini 5,1 milyon manat üstələməsi deməkdir. AHİK tərəfindən növbəti il üzrə müəyyən edilmiş proqnoz cari il üzrə gözlənilən icradan 6 milyin 592,9 min manat və ya 32,9% çoxdur ki, bu da Fondun vəsaiti hesabına maliyyələşdirilməsi nəzərdə tutulan bütün istiqamətlər üzrə xərclərin nəzərəçarpacaq dərəcədə artımı ilə əlaqədardır.

“AHİK-in məlumatına əsasən 2020-ci ildə Fondun vəsaiti hesabına maliyyələşdirilmiş xərclər 9,2 milyon manat olmuşdur. Fond tərəfindən təqdim edilmiş məlumatlara əsasən 2020-ci ildə sığortaolunanların sanatoriya-kurort müalicəsi və sağlamlaşdırma tədbirlərinin həyata keçirilməsi məqsədilə Fonddan AHİK-ə 20,5 milyon manat köçürülmüş, lakin istifadə edilməmiş 11,3 milyon manat vəsait 2021-ci ilin 1-ci yarısında Fonda geri qaytarılmışdır. İlin sonunda isə gözlənilən icra Fond tərəfindən müəyyən edilmiş proqnoz göstəricisinə bərabər, AHİK tərəfindən isə proqnozun 97,6%-i səviyyəsində olacağı nəzərdə tutulur. Ümumiyyətlə müəyyən funksiyaları müvafiq vəzifə bölgüsü əsasında olmaqla birgə həyata keçirən qrumların həmin funksiyalar üzrə icra və proqnoz göstəricilərinə dair məlumatları arasında uyğunsuzluğun olması bu istiqamətlər üzrə fəailiyyətlərin daha optimal olmaqla effektiv formada təşkilini zəruri edir”,- Rəydə deyilir.