Azərbaycanda mikromaliyyə qurumlarının sayı yenidən artmağa başlayıb.

Azərbaycan Mərkəzi Bankı (AMB) bu ilin əvvəlindən 4 bank olmayan kredit təşkilatına (BOKT, "Optimal Finance", "Azkredit", "Nas Project" və "Azfinans") və 2 kredit ittifaqına ("Zirvə" və "Total Finans") lisenziya verib, cəmi 1 kredit ittifaqının ("Mİkro Maliyyə") isə lisenziyasını ləğv edib.

Bununla yanaşı, bu il yaradılmış və hələ lisenziya almamış BOKT-lar ("FNC" və "Finkapital") da var. Mövcud vəziyyət Azərbaycanda mikromaliyyə sektoruna marağın artdığını, bu sahədə canlanma olduğunu düşünməyə əsas verir. Bu fikri "Report"a açıqlama verən "Azərbaycan Mikromaliyyə Assosiasiyası" (AMFA) İctimai Brliyinin icraçı direktoru Jalə Hacıyeva da bölüşür. Onun sözlərinə görə, koronavirus (COVID-19) pandemiyasının yaratdığı iqtisadi böhran yavaş-yavaş aradan qalxmaq üzrədir. Bu isə iqtisadi aktivliyi artırır və mikromaliyyə sektoru da bu prosesdən kənarda qalmır.

"AMB maliyyə bazarında banklarla yanaşı, BOKT-ların da fəaliyyət göstərməsində maraqlıdır. Yeni lisenziyaların verilməsi mikro maliyyə qurumlarının artan rolunun göstəricisidir. Bu gün sözügedən kredit təşkilatlarının əsas müştəri bazası kənd yerlərindədir. Kənd təsərrüfatı məhsullarının alıcıları isə əsasən restoran-kafelərdir. Koronavirus (COVID-19) pandemiyası ilə əlaqədar olaraq tətbiq olunan məhdudiyyətlər bu sektorun fəaliyyətinə mənfi təsir etmişdi. Lakin bu, müvəqqəti xarakter daşıyan bir çətinlik idi. Əksər məhdudiyyətlər artıq aradan qaldırılıb. Biznes tədricən pandemiyadan əvvəlki səviyyəyə qayıdır və aqrar sektorun məhsullarına tələbat artır. Artıq insanlardan yeni sahələrin kredtiləşməsinə dair müraciətlər gəlir. Özü də həmin insanlar risklərin idarəedilməsi məsələsində daha təcrübəlidirlər, mikro maliyyə təşkilatlarının hər zaman ehtiyac duyduğu sağlam müştəri kontinqentinə daxildirlər. Bu cür müştərilərin kredit tələbinin qarşılanması nəticə etibarı ilə BOKT-ların kredit portfelinin keyfiyyət göstəricilərinə müsbət şəkildə təsir edir", - deyə J.Hacıyeva qeyd edib.

Bununla yanaşı, icraçı direktor deyir ki, mövcud resurlar ancaq daimi müştərilərin kreditə olan ehtiyacını ödəməyə imkan verir:

"Yeni müştərilərlə işləmək üçün milli valyutada əlavə vəsaitə ehtiyac var. Bu gün BOKT-ların qiymətli kağızlar bazarında manatla borc vəsait cəlb etməsi bu qəbildən alternativ maliyyə mənbələrindən biridir. İstiqraz emissiyası vasitəsilə cəlb edilən vəsaitlər ucuz olmaqla yanaşı həmd ə daha əlçatan və az risklidir. Belə ki, xarici valyutada götürülən borc eyni valyutada da geri qaytarılır. Onun məzənnəsində devalvasiya vaxtı gördüyümüz kimi kəskin dəyişmələr olduqda çox ciddi fəsadlar doğurur. Bu baxımdan kreditləşmənin arealını genişləndirimək üçün milli valyutada vəsaitlərin cəlb olunması hazırda BOKT-lar üçün prioritet məsələdir”.

Telegramda Marja.az səhifəsinə abunə olun

"Report"