Azərbaycan manatının xarici valyutalar qarşısında qiymətinin aşağı enməyi bizə “altın yıl”ımızı, necə deyərlər, “qızıl il”imizi yaşatdı.

“Marja” xəbər verir ki, bunu “Excelsior Hotel & Spa Baku” otelinin baş meneceri Turhan Poyraz bildirib.

Onun sözlərinə görə, Dünyadakı böhran Azərbaycanda öz əksini hərtərəfli, həm də fərqli bir şəkildə göstərdi. Azərbaycanlılar çox əziyyət çəkdilər, insanların alıcılıq qabiliyyəti azaldı:

“ Amma otel kimi böyük miqdarlarda satınalma edən şirkətlər üçün Azərbaycanda qalxan qiymətlər çox böyük fərqlər yaratdı. Bir otelin ən böyük xərclərindən biri enerji daşıyıcılarına olan xərclərdir. Azərbaycanda enerji daşıyıcılarının qiymətləri - qaz və elektrik enerjisinin qiymətləri yüksəldi. Ən böyük xərcimiz bunlar olduğu üçün bu bizə çox mənfi təsir etdi, amma digər tərəfdən, bu dövrdə Azərbaycan manatının xarici valyutalar qarşısında qiymətinin aşağı enməyi bizə “altın yıl”ımızı, necə deyərlər, “qızıl il”imizi yaşatdı. Belə ki, Azərbaycan, xaricdən gəlmək istəyənlər üçün ucuz bir turizm məkanı oldu”.

Turhan Poyraz qeyd edib ki,  dövlətin keçən 10 il ərzində Azərbaycanın reklamına qoyduğu investisiyanın effekti ilə  bura axın-axın turistlər gəlməyə başlayıb:

“30- 60% məşğulluq ilə işləyən otellər hazırda tələbata cavab verə bilmir, turistlərə “yerimiz yoxdur” deyir. Bu, çox yaxşı göstəricidir. İndi demək olar ki, may ayından oktyabra qədər otellər bayram vəziyyətindədir. Mən bu yaxınlarda Dubayda keçirilən “Ərəb turizm bazarı” sərgisində oldum. Sevindirici haldır ki, burada ən çox iş- ləyən stend Azərbaycanın idi. Qeyd edim ki, Azərbaycana turistlər ilk növbədə, ərəb ölkələrindən, MDB ölkələrindən, daha çox isə Rusiya və Ukraynadan gəlir”.

“Artıq Azərbaycanda tələb təklifdən çoxdur” deyən otelin meneceri sözlərinə belə davam edib:

“Keçən ilə qədər çox çətin idi, belə ki, Azərbaycanda otellərin sayı çox olsa da, bu otellərə tələb az idi. Bəzi otellər arasında çox nömrə sayı ilə fəaliyyət göstərənlər var idi. Onlar qiymətləri salmaqla, qonaqları cəlb edirdilər. İndi belə deyil. Artıq Azərbaycanda tələb təklifdən çoxdur. Amma bizim digər otellərdən bir fərqimiz var ki, digər otellərdə olmayan açıq və qapalı hovuzlar, fitnes, SPA mərkəzi, trenajor zalı, tennis kortu, parkinq və s. oteldə var və pulsuzdur. Başqa ölkələrdə bunların çoxu ödənişlidir. Otelimizin daha bir üstün cəhətini qeyd etmək istəyirəm ki, otelimiz şəhərin mərkəzindən 4 dəqiqəlik məsafədə yerləşir. Yuxarıda sadaladıqlarım rəqabətdə bizə bəzi üstünlüklər verir”.

Turhan bəy qeyd edib ki, bu il Formula-1 ilə əlaqədar indidən otelə 48 ölkədən tələb var: “Mən builki Formula yarışları zamanı otel sayının yetməyəcəyinə əminəm”.

© Yeganə Məmmədova